Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 641 Hüküm no: 819 Orijinal metin no: [99a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eski Üsküdar kadısı Mehmed Sadi Efendi’nin aldığı borca karşılık istiğlâl yoluyla evini vakfa sattığı Husûs-ı âti’l-beyânın mahallinde tahrîri iltimâs olmağın kıbel-i şer‘-i enverden irsâl olunan mevlânâ Mehmed Efendi b. Abdülbâkī sâbıkan medîne-i Üsküdar kadısı olan a‘lemü’l-ulemâ’i’l-izâm efdalü’l-fuzalâ’i’l-fihâm yenbû‘ü’l-fezâ’il ve’l-me‘âlî metbû‘ü’l-efâzıl ve’l-e‘âlî Mehmed Sadi Efendi b. el-merhûm Yusuf Efendi’nin mahmiye-i İstanbul’da Uzun Şuca‘ mahallesinde sâkin olduğu menzile varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i hatîr eyledikde mûmâ-ileyh Mehmed Sadi Efendi meclis-i ma‘kūd-ı mezbûrda merhûm Gazanfer Ağa rûhu için İbrahim Paşa sarayı’nda tilâvet olunan eczâ-i şerîfeye mevkūfe nukūdun bi’l-fi‘l mütevellîsi olan bâ‘isü’l-kitâb Abdurrahman Efendi b. Osman nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülküm ve hakkım olup mahalle-i mezkûrda vâki‘ bir tarafdan ba‘zen Cevrücefâ Hâtun mülkü ve ba‘zen Cafer Çelebi vakfı ve bir tarafdan Kâtib Mehmed Çelebi b. Yusuf mülkü ve bir tarafdan Zuhûrî Efendi’[nin] sâkin olduğu vakıf menzil ve bir tarafdan tarîk-i âm ile mahdûd dâhilen ve hâricen büyût-ı adîdeyi müştemil menzilimi cümle hukūk ve levâhıkı ile mütevellî-i merkūm Abdurrahman Efendi’ye iki yüz seksen kıt‘a esedî guruşa bi tarîki’l-istiğlâl bey‘ ve teslîm ol dahi yedinde olan mâl-ı vakf-ı mezbûr ile vech-i muharrer üzre bi’t-tevliyye iştirâ ve tesellüm ve kabûl edip semeni olan meblağ-ı mezbûr iki yüz seksen esedî guruşu mütevellî-i merkūm yedinden ahz u kabz eylediğimden sonra mütevellî-i merkūm Abdurrahman Efendi menzil-i mahdûd-ı mezbûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan otuz gün tamâmına değin kırk iki [99b] esedî guruşa bana îcâr ve teslîm edip ben dahi vech-i muharrer üzre istîcâr ve kabûl eyledim dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ve ba‘dehû ma‘an irsâl olunan Hasan Çelebi b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Ali Efendi [b.] Hasan el-İmâm, Mehmed Beşe b. Mehmed, Hasan Bey b. Hüseyin, Mehmed Bey b. ( ) Serbölük, Haseki Mehmed Bey Baltacı, Hasan Beşe b. ( ) Çukadâr.