Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 642 Hüküm no: 820 Orijinal metin no: [99b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Erzurum ağası Yusuf Ağa’nın, Fazlullah Çelebi b. İbrahim’den alacaklı olduğu ve borcun yetimlerin vasîsi Abdullah Ağa b. Mustafa’ya verilmesi Mahmiye-i İstanbul’da Kızılminâre mahallesi sükkânından râfi‘ü’l-kitâb Abdullah Ağa b. Mustafa nâm kimesne meclis-i şer‘-i şerîf-i lâzımü’t-teşrîfde Fazlullah Çelebi b. İbrahim nâm kimesne mahzarında üzerine da‘vâ ve takrîr-i kelâm edip mahalle-i mezbûre ahâlîsinden olup bundan akdem Erzurum Ağası iken vefât edip verâseti zevce-i metrûkesi Fâtıma bt. Süleyman Ağa ve evlâd-ı sıgārı Sâliha ve Hatice ve Emine’ye münhasıra olan Yusuf Ağa b. Abdullah’ın mezbûr Fazlullah Çelebi zimmetinde deyn-i şer‘îden elli riyâlî guruş hakkı olup müteveffâ-yı mezbûr hayâtında sıgār-ı merkūmûna beni vasî nasb ve ihtiyâr etmekle suâl olunup meblağ-ı mezbûrdan sıgār-ı mezbûrûnun hisseleri olan kırk üç tamâm ve üç rub‘ riyâlî guruşu bana edâya mezbûr Fazlullah Çelebi’ye tenbîh olunması matlûbumdur dedikde, gıbbe’s-suâl mezbûr Fazlullah Çelebi müteveffâ-yı mezbûra cihet-i mezbûrdan elli riyâlî guruş deyni olduğunu ikrâr lâkin müdde‘î-i mezbûrun vech-i muharrer üzre vesâyetini inkâr edicek müdde‘î-i mezbûrdan vech-i mübeyyen üzre vesâyete beyyine taleb olundukda mahmiye-i mezbûrdan Kâtib Muslihiddin mahallesi sükkânından es-Seyyid Mahmud Çelebi b. Mustafa ve Hacı Abdurrahman b. Hüseyin nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr hayâtında evlâd-ı sıgārına bizim huzûrumuzda müdde‘î-i mezbûru vasiyy-i muhtâr nasb ve ihtiyâr etmişidi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olup mûcebince müdde‘î-i mezbûrun vech-i mübeyyen üzre vesâyetine hükm olunup meblağ-ı mezbûrdan sıgār-ı merkūmûnun hisseleri olan kırk üç tamâm ve üç rub‘ riyâlî guruşu müdde‘î-i mezbûra edâ ve teslîme mezbûr Fazlullah Çelebi’ye tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ-yı muhzırân, Şaban Ağa Ser muhzırân, İbrahim Çelebi b. Mehmed, Hasan Çelebi b. Ahmed.