Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 643 Hüküm no: 821 Orijinal metin no: [99b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Hasan’ın, arsasının bir sehmini el-Hâc Receb b. Mustafa’ya sattığı Mahmiye-i İstanbul’da Karabaş mahallesi sâkinelerinden Âişe bt. Hasan nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân mahalle-i mezbûre sükkânından Şaban b. Ali ve Yedikule kurbunda sâkin Sâlih b. Ali nâm kimesneler şehâdetleri ile şer‘an sâbit olan Abdurrahman Çelebi b. Abdüllatîf nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bâ‘isü’l-kitâb el-Hâc Receb b. Mustafa nâm kimesne mahzarında ikrâr-ı tâm ve takrîr-i kelâm edip mahmiye-i mezbûrda Emin Nureddin mahallesinde vakı‘a bir tarafdan Mehmed Ağa mülkü ve bir tarafdan Haraçcı Mustafa mülkü ve bir tarafdan Sâ‘atçi ( ) mülkü ve bir tarafdan tarîk-i âm ile mahdûde olup altı sehimden bir sehmi müvekkilemin ve beş sehmi Fâtıma nâm sagīrenin mülkü olan arsadan müvekkilem mezbûre Âişe altı sehimden hissesi olan bir sehm-i şâyi‘ini mezbûr el-Hâc Receb’e tarafeynden îcâb ve kabûlü hâvî bey‘-i kat‘î ile yüz altmış esedî guruşa bey‘ ve teslîm edip ol dahi iştirâ ve tesellüm ettikden sonra semen-i mezbûru yedinden tamâmen ahz u kabz eyledi, min ba‘d arsa-i mezbûrenin altı sehimden bir sehm-i şâyi‘i mezbûr Hacı Receb’in mülk-i müşterâsı ve hakk-ı sırfıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Efendi [b.] Musli el-İmâm, umdetü’l-eşbâh Abdüllatîf b. Ali, Mehmed Çelebi b. Receb, Hacı Ahmed b. Abdullah, Mehmed Efendi el-İmâm, Mehmed Efendi [b.] Ahmed.