Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 644 Hüküm no: 822 Orijinal metin no: [99b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Girit’te esir düşüp âkıbeti bilinmeyen Mustafa b. Yusuf’un mirası davası Mahrûse-i Galata müzâfâtından kasaba-i Tophâne’de Dökücübaşı mahallesi sükkânından bâ‘isetü’l-kitâb Fâtıma bt. Yusuf nâm hâtun, meclis-i şer‘de li ebeveyn karındaşı olup bundan akdem vefât eden Şaban b. Yusuf’un zevcesi ve sagīr oğlu Hasan’ın vasîsi olan Zülfikār bt. Abdullah nâm hâtun mahzarında takrîr-i kelâm ve ta‘bîr ani’l-merâm edip hâlâ Cezîre-i Girit’de olan karındaşım Hasan Beşe bundan akdem esir olup hayâtı ve memâtı nâ-ma‘lûm olan âhar karındaşım Mustafa’nın malından yedine emânet olan yüz yirmi guruşu bana ve kız karındaşım Kerime nâm hâtuna teslîm için cezîre-i mezbûrda umdetü’l-eşbâh Kapıcızâde Ahmed Bey’e teslîm edip Ahmed Bey dahi ba‘de’l-kabz getirip bize teslîm etmekle esir-i mezbûr Mustafa’nın vefâtı sâbit değil iken mezbûre Zülfikār meblağ-ı mezbûrdan …? bana ve sagīr-i mezbûra hisse verin, mu‘ârazadan hâlî değildir suâl olunup vech-i mübeyyen üzre mu‘ârazadan men‘ olunmak matlûbumdur dedikde gıbbe’s-suâl mezbûre Zülfikār kaziyye minvâl-i muharrer üzre olduğunu bi tav‘ihâ ikrâr etmeğin mûcebince mezbûre Zülfikār vech-i mübeyyen üzre mu‘ârazadan men‘ olunmağın mâ vaka‘a bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Musli Çavuş b. Yusuf el-Mübâşir, Ali b. Abdi, Ahmed b. Abdülmümin, Ömer Efendi b. Hüseyin, Hasan Çelebi b. Ahmed.