Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 534 Hüküm no: 678 Orijinal metin no: [128a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Artin ve Agop’un haffafhane açmayacaklarını taahhüt ettikleri Ma‘rûz. Mumcu Mehmed Beşe kullarıyla Bâb Mahkemesi’ne ihzâr olunan dikici tâifesinden Artin v. Gob [Artin ve Agop] nâm Ermenilerden hasımları Arasta-i kebîr kethüdâsı el-Hâc Abdullah ve yiğitbaşısı es-Seyyid Ebûbekir ve Dikicibaşı es-Seyyid Ca‘fer ve Avratpazarı haffâfları kethüdâsı Ahmed ve erbâbından cemm-i gafîr ve cem‘-i kesîr Müslimîn meclis-i şer‘de kadîmü’l-eyyâmdan berü dikici tâifesi metâ‘larını odalarında ve hanlarında ve menzillerinde dikip ba‘dehû haffâfhânelerimizde bey‘ men-yezid ve semen-i misilleriyle tâlibine bey‘ edip bu vech üzere beynimizde nizâm ve kadîmden olan haffâfhânelerden ziyâde haffâfhâne ihdâs olunmak bâ-fermân-ı âlî ve bâ-hatt-ı hümâyûn memnû‘ iken merkūmân Artin ve Agop ve refîkleri gāibûn ani’l-meclis üç nefer Ermeniler kadîme mugāyir ve hatt-ı hümâyûn-ı şevket-makrûna muhâlif Avratpazarı kurbünde Haseki sûkunda haffâfhâne ihdâs murâd etmişlerdir deyü her biri teşekkî eyledikde mezbûrân Artin ve Agop kaziyye vech-i muharrer üzere olduğunu her biri ba‘de’l-ikrâr metâ‘larını sâbıkā sâkin oldukları mahalde işleyip mugāyir-i hatt-ı hümâyûn hareket etmemek üzere her biri ta‘ahhüd eylediği tescîl ve bi’l-iltimâs huzûr-ı âlîlerine i‘lâm olundu. Fermânı. Fî 18 L sene 1143.