Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 535 Hüküm no: 679 Orijinal metin no: [128b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir b. Abdullah’ın Meryem bt. Ali’nin zevcesi olduğunu ispatladığı Ma‘rûz. Türkmen tâifesinin Muhâcirîni cemâ‘atinden sâhib-i arzuhâl Abdulkādir b. Abdullah yine tâife-i mezbûreden Halil b. Hasan ile mezbûr Halil’in zevce-i menkûha-i gayr-ı medhûlün-bihâsı Meryem bt. Ali nâm bikr-i bâliğa hâzır olduğu hâlde ba‘de’l-murâfa‘a mezbûre Meryem’i işbu hâzır bi’l-meclis babası ve velîsi Mecîdî Ali b. ( ) târih-i kitâbdan on üç sene mukaddem sagīre olduğu hâlde yirmi dört bin akçe mehr-i mu‘accel ve on iki bin akçe mehr-i müeccel ile bi’l-velâye bana akd ve tezvîc eylediğinden sonra işbu sene-i mübârekede mezbûre Meryem akd-i evveli inkâr ile nefsini mezbûr Halil’e nikâh-ı bâtıl ile tezvîc etmekle bundan akdem mezbûr Halil asâleten mezbûre Meryem tarafından babası işbu mezbûr Ali vekâleten Aksaray kādısı Ahmed Efendi huzûrunda murâfa‘a olunduğumuzda ben dahi akd-i sâbık-ı mezkûru Molla İbrahim b. Abdurrahman b. İbrahim ve Abdurrahman Bey b. el-Hâc Ali b. Ömer şehâdetleriyle muvâcehelerinde vech-i şer‘î üzere isbât ve benim zevce-i menkûham olduğuna hükmolunmuş iken hâlâ mezbûr Meryem nefsini bana teslîmden imtinâ‘ eder deyü da‘vâ ve mazmûnu min-külli’l-vücûh takrîr-i meşrûhuna mutâbık ve kādı-ı mezbûrun hat ve hatmini hâvî bir kıt‘a hüccet-i şer‘iyye ibrâz eylediğinde mezbûrân Halil ve Meryem akd-i sâbık-ı mezbûru ve hükm-i mezkûru bi’l-külliye inkâr etmeleriyle müdde‘î-i mezbûr mazmûn-ı hüccet-i mezkûreyi udûl-i Müslimînden kazâ-i mezbûre sükkânından Mehmed Bey b. Receb ve Ebûbekir b. el-Hâc Ahmed şehâdetleriyle muvâcehelerinde vech-i şer‘î üzere isbât etmekle ba‘de’t-ta‘dîl ve’t-tezkiye mezbûre Meryem müdde‘î-i mezbûrun zevce-i menkûha-i sahîhası olduğuna hüküm ve tenbîh olunduğu huzûr-ı âlîlerine i‘lâm olundu. Fî 7 min-Recebi’l-ferd sene [1]143.