Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 536 Hüküm no: 680 Orijinal metin no: [128b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata’daki boyacıların İbrahim Paşa sarayında ikametlerinin meşru olmadığı Ma‘rûz. Galata’da sâkin boyacı tâifesi kütübhâne evkāfından İstanbul’da vâki‘ İbrahim Paşa sarayı demekle ma‘rûf mahalde kârhânede sâkin elvânıyla dikiş ipliği ve penbe boyayan boyacılar ile ba‘de’l-murâfa‘a bizler cemî‘ şürûtunu kabûl etmekle mârru’z-zikr İbrahim Paşa sarayı k[â]rhânesine nakil yâhud zikrolunan eşyâyı sıbâgat için verilmesini taleb ederiz deyü iddi‘â etmeleriyle kârhâne-i mezkûrede sâkin boyacıların yedlerine ihsân buyrulan hatt-ı hümâyûn-ı celâlet-makrûna nazar olundukda bir kıt‘a hatt-ı hümâyûnda Galata ve Üsküdar ve Hazret-i Eyyüb ve sâir mahalde olan boyacılar bunların şürûtunu kabûl ederler ise kârhâne-i mezkûreye naklolunup kabûl etmezler ise mârru’z-zikr dikiş ipliği elvânıyla ve penbe ipliği boyamakdan men‘ ve bir kıt‘a hatt-ı hümâyûn dahi sâlifü’z-zikr kazâlarda olan boyacılar Mısır kuşağı ve ihrâm ve Pravişte ihrâmı ve keçe ve kebe ve Karacalar kuşağı boyamakdan mutlaka men‘ buyrulup bu sûretde kabûl-i şürûtuyla nakilleri lâzım gelip lâkin boyacı esnâfının kethüdâları Ahmed b. Abdurrahman ve yiğitbaşıları Mustafa b. Mehmed ve el-Hâc Ali b. İsmail ve Hüseyin b. Mehmed ve Hasan b. Şa‘ban ve Mustafa b. Osman ve Süleyman b. Ali ve Süleyman Çelebi b. Hüseyin ve es-Seyyid İbrahim b. Ma‘den ve kethüdâ-yı sâbık el-Hâc Mustafa b. Musa ve Mustafa Çelebi b. Ahmed ve İsmail b. Hasan nâm kimesneler Galata’da vâki‘ boyacıların kârhâne-i mezkûrede sâkin olmalarına mahallin müsâ‘ade olmadığından mâ‘adâ iddi‘â eden boyacılar kadîmden zikrolunan eşyâları boyamak san‘atları olmayıp onlar köhne esvâb boyaya gelmişlerdir deyü haber verdiklerinden mâ‘adâ k[â]rhâne-i mezkûre müsakkafât-ı vakfdan olup mütevellînin îcârına mevkūf ve henüz mütevellî-i vakf tarafından mahallin müsâ‘adesi olmadığından îcâr olunmamağla cebren ol mahâlde süknâya talebleri ber-vech-i meşrûh olmadığı huzûr-ı âlîlerine i‘lâm olundu. Fermân. Fî 6 Recebi’l-ferd sene [1]143.