Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 536 Hüküm no: 681 Orijinal metin no: [129a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Bahşayiş Mahallesi halkının Esirci Ayşe’nin hareketlerinden memnun olmadıklarından başka mahalleye ihracına emir talebi Ma‘rûz. Ashâb-ı arzuhâl Kuyumcu Bahşayiş Mahallesi imâmı Mustafa Efendi ve Müezzin Hâfız Abdullah Efendi ve ahâlîsinden diğer Hâfız Abdullah Efendi ve el-Hâc Ahmed ve el-Hâc Hasan ve el-Hâc Mehmed ve el-Hâc İbrahim ve sâirleri yedi nefer ma‘lûmü’l-esâmî Müslimîn meclis-i şer‘de mahalle-i mezbûre sâkinelerinden Esîrci Âişe nâm avrat kendi hâlinde olmayıp dâimâ esîr bahânesiyle ricâl ve nisâdan birbirlerine nâ-mahrem kimseleri menziline getirip fısk ü fesâd üzere olmağla mezbûre Esîrci Âişe’den bir vechile râzı ve emîn ve hoşnûd değilleriz deyü her biri teşekkî ve sû-i hâlini ihbâr eylediklerinden gayrı mezbûre Esîrci Âişe kıbel-i şer‘den birkaç def‘a da‘vet olundukda itâ‘at-ı şer‘ etmemeğin ashâb-ı arzuhâl mahalle-i mezbûreden ihrâc olunması bâbında fermân-ı âlî iltimâs ettikleri huzûru âlîlerine i‘lâm olundu. Fermân men-lehü’l-emrindir. Fî 7 B sene [1]143.