Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 537 Hüküm no: 683 Orijinal metin no: [129a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefîne reislerinden es-Seyyid Süleyman’ın açtığı alacak davasını delillendiremediği Ma‘rûz. Sefîne reislerinden sâhib-i arzuhâl es-Seyyid Süleyman meclis-i şer‘de sâbıkā şerîki Kefeli Murtaza mahzarında bundan akdem şerîkim mezbûr ile fesh-i akd-i şirket ve derûn-ı arzuhâlde mezkûr sermâye ve fâizi ba‘de’l-hesâb hisse-i ma‘lûmem tahsîl olunmasın taleb ederim deyü da‘vâ ve mezbûr Murtaza cevâbında müdde‘î-i mezbûr ile mârru’z-zikr sermâye ve fâizi mukaddemâ cemm-i gafîr Müslimîn muvâcehesinde zikrolunan Kefe kādısı efendi huzûrunda hesâb görüp birbirimize nesne hakkımız zuhûr etmemeğin yedime hüccet dahi vermişdir deyü def‘ ve takrîrine muvâfık bir kıt‘a hüccet ibrâz ve mezbûr es-Seyyid Süleyman inkâr etmekle mezkûr Murtaza mazmûn hüccet-i mezkûreyi şuhûd-ı udûlden Cihângirî Kapudan Mustafa b. İbrahim ve Sarıkamış el-Hâc Ali b. Mehmed ile isbât etmeğin mezbûr es-Seyyid Süleyman bî-vech mu‘ârazadan ba‘de’l-men‘ tekrar ber-mûceb-i defter beynlerinde ma‘lûm sefîne âlâtından yüz otuz üç guruş da‘vâ ve müdde‘âsını isbâtdan izhâr-ı acz etmekle bi’t-taleb mezbûr Murtaza’ya yemîn verilip mezbûr es-Seyyid Süleyman bilâ-beyyine bî-vech mu‘ârazadan men‘ olunduğu huzûru âlîlerine i‘lâm olundu. Bâkī fermân men-lehü’l-emrindir. Fî 9 Recebi’l-ferd sene [1]143.