Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 539 Hüküm no: 686 Orijinal metin no: [129b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostanî Ahmed Haseki ve ortağı Halil ile Mehmed Ağa’nın İştib hassı davasında sulh oldukları Ma‘rûz. Derûn-ı arzuhâlde mezkûr Bostanî Ahmed Haseki ve şerîki Halil nâm kimesneler sâbıkā Köstendil sancağı mütesellimi Mehmed Ağa ile ba‘de’l-murâfa‘a sancak-ı mezkûra tâbi‘ İştib hâssını bizler [bin yüz] kırk bir senesi Şa‘bânı’nda vâki‘ Mart ibtidâsında mütesellim-i sâbık Hüseyin Efendi’den dokuz yüz elli guruşa iltizâm ve iki yüz doksan altı guruş ve bir zolota kendiye ba‘de’t-teslîm [bin yüz] kırk iki senesi Muharremi evâsıtında mezkûr Mehmed Ağa mütesellim olmağla Hüseyin Efendi’ye teslîm için kendiye verdiğimiz yüz elli guruşdan mâ‘adâ cebren iki yüz guruşumuzu almışidi deyü da‘vâ ve Mehmed Ağa cevâbında ben mütesellim olduğumdan sonra mezbûrân evâsıt-ı Muharrem’den gurre-i Receb’e dek beş buçuk ay hass-ı mezkûru zabt ve ba‘dehû mezbûr Hüseyin Efendiye teslîm içi mârru’z-zikr yüz elli guruşunu verdiklerinden sonra işbu yedimde olan hüccet ve defter mûcebince İştib ve Kratova kādıları huzûrlarında hass-ı mezkûr îrâdından seksen iki bin sekiz yüz seksen dokuz akçe kabzını i‘tirâf etmeğle zamânıma isâbet eden mikdârımı kendi i‘tirâflarıyla kabz etmişidim deyü def‘ ve mazmûn hüccet ve defter beyâna havâle olunduğundan sonra beynlerine muslihûn tavassut ve mezbûrân da‘vâ-yı mezkûrelerinden elli guruşa sulh ve bedelini kabz, husûs-ı mezkûre müte‘allika âmme-i da‘vâdan birbirlerinin zimmetlerini ibrâ eyledikleri huzûru âlîlerine i‘lâm olundu. Emr hazret-i veliyyü’l-emrindir. Hurrire fî-11 Recebi’l-ferd sene [1]143.