Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 540 Hüküm no: 689 Orijinal metin no: [129b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balıkpazarı’ndaki Yahûdhanelerde Yahûdilerin iskanına engel olunmaması Ma‘rûz. Ayasofya-i kebîr ve Ferhad Paşa vakıflarından İstanbul’da Balıkpazarı kurbünde vâki‘ on altı bâb Yahûdhânenin bazının mutasarrıfları bi-nefsihim ve bazının dahi mutasarrıfları eytâm olmağla <> vasîleri ashâb-ı arzuhâl meclis-i şer‘de her biri takrîr ve tâ‘bir ani’l-merâm edip mârru’z-zikr Yahûdhânelerde kadîmden berü Yahûdi sâkin olagelmiş iken Maktûl Mehmed Kethüdâ mahâll-i mezkûrda hân ve sâir akārât binâ etmek için bizleri tazyîk ve yedlerimizden Yahûdhâne[leri] bahâ-yı rahîs ile iştirâ irâdesiyle sâkin olan Yahûdilerin bâ-fermân-ı âlî ihrâc ve taraf-ı vakfa ve bizlere gadr ve zulüm edip ve mahâll-i mezkûr ehl-i İslâm meskeni olmağla yine sâlifü’z-zikr Yahûdhânelerde âdet-i kadîme üzere Yahud sâkin olması için fermân-ı âlî iltimâs etmeleriyle şeref-yâfte-i sudûr olan fermân-ı âlîlerine imtisâlen kıbel-i şer‘-i enverden iki def‘a irsâl olunan nâib dâ‘îleri mahâll-i mezkûra varıp vukūfu olan bî-garaz Müslimînden sırren ve alenen istihbâr eylediğinde udûl-i Müslimînden elliden mütecâv[iz] kimesneler hâl bâlâda bast olunan minvâl üzere olup ve meyhâne işlemedikleri [130a] sûretde kadîmî üzere mârru’z-zikr Yahûdhânelerde Yahûdi sâkin olmak taraf-ı vakfa ve eytâm-ı mezkûra her vechile enfa‘ ve hayırlı olduğundan mâ‘adâ mezbûr Mehmed Kethüdâ zamânında hâhiş-i iskân olunmağla bir vechile emniyet yokdur deyü her biri alâ-tarîkı’ş-şehâde haber vermeleriyle vech-i meşrûh üzere kadîmî üzere Yahûdi iskânı için fermân iltimâs eyledikleri huzûr-ı âlîlerine i‘lâm olundu. Bâ[kī] fermân men-lehü’l-emrindir. Hurrire fî-17 Recebi’l-ferd sene [1]143.