Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 541 Hüküm no: 690 Orijinal metin no: [130a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şüca Anbarî Vakfı’na ait hisselerin sattırıldığına dair iddialarının doğru olmadığı Ma‘rûz. Ashâb-ı arzuhâl Mehmed karındaşı Ali b. Mehmed İstanbul kādıları nezâretinde olan evkāfdan Şücâ‘ Anbârî Vakfı’ndan İstanbul’da Langa-i kebîr kurbünde Kâtib Kasım Mahallesi’nde vâki‘ ma‘lûmü’l-hudûd bir bâb menzilin bi’l-icâreteyn mutasarrıfı Avanis v. Serkiz nâm zimmî ile vakf-ı mezbûr mütevellîsi el-Hâc İsmail Efendi hâzır olduğu hâlde ba‘de’l-murâfa‘a menzil-i mezkûr sagīre kız karındaşımız Sâliha ile bi’l-iştirâk tasarrufumuzda iken bundan akdem vezîr-i sâbık maktûl İbrahim Paşa’nın makremecibaşısı Abdurrahman nâm kimesne kendi sâkin olduğu odada ibşu mütevellî İsmail Efendi hâzır olduğu hâlde bizlere kerhen bizler dahi mükrehen menzil-i mezkûru on beş kîseye tahammülü var iken beş kîse bedel mukābelesinde mezbûr Abdurrahman’a bâ-ma‘rifet-i mütevellî fâriğ ba‘dehû ol dahi bâ-ma‘rifet-i mütevellî mesfûr Avanis’e fâriğ olmuş idi deyü menzil-i mezkûru da‘vâ ve mesfûr Avanis cevâbında sagīr-i mezbûrun hissesini vasîsi zarûret-i nafakasi’çün işbu hüccet-i şer‘iyye mantûkunca kıbel-i şer‘den me’zûnen ve müdde‘iyân-ı mezbûrân asâleten menzil-i mezkûru ber-vech-i muharrer bi-tav‘ihim mezbûr Abdurrahman’a fâriğ olduklarından sonra ol dahi bâ-ma‘rifet-i mütevellî bana fâriğ olmuş idi deyip lâkin vakf-ı menzil-i mezkûrun hakīkatda tasarrufu mütevellînin olup mütevellî-i mezbûr İsmail Efendi istintak olundukda vakfiyetinde zikrolunan ferağlar kerhle olmadığını haber ve husûs-ı mezkûrda müdde‘î olmadığından mâ‘adâ mükrehün-bihi dahi ta‘yîne kādir olmayıp ve mezbûr Abdurrahman erbâb-ı ikrâhdan dahi olmamağla müdde‘iyân-ı mezbûrân Mehmed ve Ali bî-vech mu‘ârazadan men‘ olundukları huzûr-ı âlîlerine i‘lâm olundu. Fî 16 Receb sene [1]143.