Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 542 Hüküm no: 692 Orijinal metin no: [130a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Efendi ve kardeşi el-Hâc Ahmed Ağa aleyhine alacak iddiasının haksız olduğu Ma‘rûz. Sâhib-i arzuhâl Ahmed ve derûn-ı arzuhâlde mastûrü’l-ism Halil Efendi’nin karındaşı ve vekîl-i şer‘îsi el-Hâc Ahmed Ağa mahzarında müvekkil-i mezbûr Halil Efendi’nin Çekmece-i kebîr akrebinde vâki‘ Keşlili [Keşli] çiftliği demekle ma‘rûf çiftliğinde bin yüz otuz sekiz ve [bin yüz] otuz dokuz senelerinde çiftlik kethüdâsı olmamla müvekkil-i mezbûr ile vekîl-i merkūm zimmetlerinde çiftlik-i mezbûrun mesârifât ve gerek hizmetkâr ücretlerinden ber-mûceb-i defter-i müfredât üç yüz on beş guruş hakkım bâkī kalmışdır deyü da‘vâ eylediğinde vekîl-i mezbûr dahi cevâbında müdde‘î-i mezbûrun zikrolunan senelerde çiftlik-i mezbûr kethüdâsı olduğunu ikrâr lâkin yedime verdiği mümzâ ve mahtûm bir kıt‘a temessükü nâtıka olduğu üzere bin otuz dokuz senesi Saferi’l-hayrı gurresinden [bin yüz] kırk senesi Saferi’l-hayrı evâsıtına gelince iki senede olan gerek masrûfât ve gerek hizmetkâr ücretlerini ber-mûceb-i defter-i müfredât ba‘de’l-hesâb bi’l-cümle masrûfâtını yedinden ahz u kabz eylediğinden sonra târih-i mezbûra gelince çiftlik-i mezbûr masrûfâtına müte‘allika âmme-i da‘vâdan benim ve karındaşım müvekkil-i mezbûrun zimmetini ibrâ ve iskāt eylemişdir deyü mazmûnu min-külli’l-vücûh takrîrine mutâbık temessük ibrâz ile da‘vâyı def‘ ve def‘-i mezkûrunu şâhidîn-i âdilîn ile muvâcehesinde vech-i şer‘î üzere isbât etmeğin müdde‘î-i mezbûr bî-vech mu‘ârazadan men‘ olunduğu huzûr-ı âlîlerine i‘lâm olundu. Bâkī fermân hazret-i veliyyü’l-emrindir. Fî 16 min-Recebi’l-ferd sene [1]143.