Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 543 Hüküm no: 694 Orijinal metin no: [130b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogasıcı esnafı ile peştamâlci esnafının aralarındaki yamaklık davasında anlaştıkları Ma‘rûz. Cüllâh tâifesinden bogasıcı hırfetinin kethüdâları Ahmed Halîfe ve yiğitbaşıları Mustafa ve sâir üstâdları meclis-i şer‘de sâhib-i arzuhâl peştamâlci hırfetinin kethüdâları Mustafa ve üstâdlarından Ali ve Mustafa ve Ömer ve Ali ve Yusuf ve İbrahim ve sâir üstâdları muvâcehelerinde beyâz astâr ve dimici tâifesi kadîmü’l-eyyâmdan berü bize yamak olup vâki‘ olan düstûrlarımızda beynimizde kadîmden cârî ve âdet olduğu vech üzere peştamâli hırfetimiz üstâdlarından kuşanıp hilâf-ı kānûn ve mugāyir peştamâlci tâifesi bî-vech müdâhale etmeleriyle suâl olunup müdâhaleleri def‘ olunması matlûbumuzdur deyü ba‘de’l-murâfa‘a beynlerine muslihûn tavassut edip ba‘de’l-yevm Rum tâifesinden Ağabet ve Yorgi ve Nikola ve İlyas ve Ermeni tâifesinden Melkon ve beş nefer üstâdlar bogasıcı tâifesine yamak olup ve Arnavud üstâdları bi-ecma‘him peştamâlci hırfeti ahâlîsine yamak olmak üzere beynlerinde ittifâk ve ittihâd ve bu vech üzere terâzî edip kat‘-ı nizâ‘ eyledikleri ba‘de’t-tescîl huzûr-ı âlîlerine i‘lâm olundu. Fermân men-lehü’l-emrindir. Hurrire fî-19 min-Recebi’l-ferd sene [1]143.