Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 543 Hüküm no: 695 Orijinal metin no: [130b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dragan’ın eşi Plaşa ile muhala‘a yoluyla boşandığını itiraf ettiği Ma‘rûz. Sâhib-i arzuhâl Dragan zimmî meclis-i şer‘de derûn-ı arzuhâlde mezkûrü’l-ism Plaşa nâm Nasrâniye muvâcehesinde mezbûre Plaşa zevce-i menkûham iken üç aydan berü nefsini bana teslîmden imtinâ‘ eder taleb ederim deyü da‘vâ eyledikde mezbûre Plaşa cevâbında ber-vech-i muharrer üç ay mukaddem ben zevcim mezbûr ile zimmetinde mütekarrir ve ma‘kūdun-aleyh yirmi beş guruş mehr-i müeccelim ve kendiye def‘ ve teslîm eylediğim elli yedi guruş bedel-i hu‘l olmak üzere lede’ş-şuhûd muhâla‘a-i sahîha ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan birbirimizi ibrâ ve iskāt etmişidik deyü da‘vâyı def‘ edicek mezbûr Dragan kaziyye vech-i muharrer üzere olduğunu ikrâr u i‘tirâf etmeğin mûcebince bî-vech mu‘ârazadan men‘ olunduğu huzûr-ı âlîlerine i‘lâm olundu. Fermân men-lehü’l-emrindir. Fî 21 Receb sene [1]143.