Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 544 Hüküm no: 696 Orijinal metin no: [130b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saray-ı Cedid’de yeri olan boyacı esnafının taşradaki dükkanlarda boyama işi yapmamaları konusunda tenbih olunduğu Ma‘rûz. Saray-ı cedîd-i âmire’de bundan akdem binâ buyrulan Kütübhâne Vakfı müsakkafâtından Fazlıpaşa sarayında olan mahalli vakf-ı mezbûr mütevellîsi boyacı tâifesinden ma‘lûmü’l-esâmî kimesnelere bâ-fermân-ı âlî ikrâz ve bi’t-tevliye ba‘de’l-îcâr ve mâ‘adâ mahal kalmayıp kendilere nesne îcâr olunmayıp İstanbul ve kurâ ahâlîlerinin ba‘zı atîk ve cedîd eşyâlarını boyamak için lüzûmu olmağla bâ-fermân-ı âlî taşrada Türk? hurdacı tâ‘bir olunur boyacı tâifesinden ashâb-ı arzuhâl yirmi dokuz aded dükkân ahâlîsi meclis-i şer‘de kethüdâ ve yiğitbaşı ve ihtiyârlarından cemm-i gafîr muvâcehelerinde saray-ı mezkûrda mahalli olan boyacı tâifesinden bazıları taşrada olan on iki zimmî hurdacı dükkânları ashâbıyla şerîk olup hatt-ı hümâyûn ile kendilere saray-ı mezkûrda boyamak üzere mahsûs olan metâ‘ın taşrada zikrolunan hurdacı dükkânlarında boyayıp biz dahi ber-vech-i muharrer boyamak murâd eylediğimizde mezbûrûn mümâna‘at ve bize gadr murâd ederler deyü teşekkî edip husûs-ı mezkûr bâ-fermân-ı âlî memnû‘ olmağın fi’l-hakīka saray-ı mezkûrda mahalli olmayıp ber-vech-i muharrer hatt-ı hümâyûnda ta‘yîn ve tasrîh olunan metâ‘ı ancak saray-ı mezkûrda boyamak üzere her birine ba‘de’t-tenbîh hurdacı tâifesi olan boyacılara ber-mûceb-i hatt-ı hümâyûn kendilere mahsûs metâ‘larına müdâhale etmemek üzere her biri ta‘ahhüd eylediği huzûr-ı âlîlerine i‘lâm olundu. Fî 23 Recebi’l-ferd sene [1]143.