Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 544 Hüküm no: 697 Orijinal metin no: [131a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih’in ortağı Osman’a paçacı dükkanındaki malzemelerden dolayı açtığı davada haksız olduğu Ma‘rûz. Arzuhâl eden Salih meclis-i şer‘de şerîki Osman mahzarında derûn-ı arzuhâlde mezkûr paçacı dükkânında mevcûde beynlerinde ma‘lûme âlâtın sülüsânı benim sülüsü şerîkim mezbûr Osman’ın yedimizde mülkümüz iken mezbûr Osman âlât-ı mezkûrenin nısfına bi-gayr-ı hakkın vaz‘-ı yed etmekle ber-vech-i muharrer taleb ederim deyü da‘vâ eyledikde mezbûr Osman cevâbında merhûm Kethüdâzâde efendinin yedinde olan i‘lâmı nâtık olduğu üzere âlât-ı mezkûrenin nısfı yedinde mülkü ve nısf-ı âharı benim yedimde mülküm idiğini şuhûd mahzarında ikrâr ve işhâd etmişidi deyü def‘ ve ba‘de’l-inkâr mezbûr Osman mezkûrîni şuhûd-ı udûlden kethüdâları Murad Beşe ve yiğitbaşıları İslam ve erbâbından Süleyman b. Mehmed ve diğer Süleyman b. Murad ve Mehmed b. Hamza nâm kimesneler ile muvâcehesinde isbât etmeğin mûcebince zikrolunan âlât beynlerinde nısf olmak üzere hükmolunduğu huzûr-ı âlîlerine i‘lâm olundu. Fermân men-lehü’l-emrindir. Hurrire fî-22 min-Recebi’l-ferd sene [1]143.