Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 545 Hüküm no: 698 Orijinal metin no: [131a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenişehir’e tâbi Sarıcalar köyündeki çiftlik davası için tarafların İstanbul’a davet edildiği Emr oldukda huzûrumda murâfa‘a-i şer‘ olalar deyü buyruldu. Devletlü sa‘âdetlü inâyetlü sultanım hazretleri sağ [olsun] bu fakīre câriyeniz Yenişehir sâkinelerinden olup kerîmesi olduğum merhûm pederim Turhan Bey’den müntakil yine kazâ-i mezbûra tâbi‘ Sarıcalar nâm karye toprağında çiftliği zevcim Ahmed nâm kimesne haberim yoğiken gıyâbımda on beş kîse akçe kıymetli cümle tevâbi‘i ve levâhıkı ile Arnavud Hacı Hüseyin nâm kimesneye bey‘ edip mezbûr Hacı fevt oldukda Galata voyvoda-i sâbık Hacı Ahmed Ağa vasî olup müteveffânın bir oğlu ve bir kızı ile çiftliği mezbûrîn zabt, oğlu mezbûr fevt olup mezbûr Hacı Ahmed Ağa ile kızı mezbûrenin zabtlarında olup bu ana gelince mesâfe-i ba‘îde ve mahrem-i şer‘iyyem hasebiyle ve merkūm ile dahi mukāvemet mümkün olmayıp mütegallibeden olmağla zamân mürûr etmeğle şimdi bu fakīre şedd-i rahl edip bu tarafa geldikde ahvâlim izzetlü efendime arzuhâl eylediğimde mezbûr Hacı Ahmed ve mezbûre ile huzûr-ı sa‘âdetde murâfa‘a-i şer‘ olup icrâ-yı hak olunmak bâbında yedime fermân-ı âlî ihsân olunup da‘vet için mübâşir çavuş kullarıyla vardığımızda mîrîye olan deyni edâ olunmadıkça kimesne beni da‘vet-i şer‘ etmesin deyü iki kıt‘a fermânım vardır deyü cevâb ve itâ‘at-ı fermân etmeyip gadr murâd eder sultanımdan merâhim-i aliyyelerinden mercûdur ki yedimde olan fetvâ-yı şer‘iyye mûcebince mezbûrun ol vechile ibrâz eylediği fermân te‘addîsini men‘ olunup mezbûr Hacı Ahmed ve mezbûre hatun ile huzûr-ı sa‘âdetlerinde murâfa‘a-i şer‘ olunup icrâ-yı hak olunmak bâbında fermân sultanımındır.