Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 546 Hüküm no: 702 Orijinal metin no: [131b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun’un inşa etteği evin pencerelerine tahta sütre çekmeyi taahhüt ettiği Ma‘rûz-ı dâ‘îleridir ki; Sâdır olan fermân-ı âlîlerine imtisâlen cânib-i şer‘den irsâl olunan keşif nâibimiz Mevlânâ Mehmed Abdullah Efendi dâ‘îleri hâssa mi‘mâr hulefâsından el-Hâcı Mustafa Halîfe ve Ali Halîfe ile sâhib-i arzuhâl Süleyman’ın derûn-ı arzuhâlde mezkûr Altıpoğaça Mahallesi’nde vâki‘ menzilinde cemâ‘at-i Müslimîn huzûrunda akd eylediği meclisde mezbûr Süleyman ve mukābilinde sâkin Mustafa asâleten ve Mehmed Odabaşı dahi kezâlik asâleten ve diğer Mustafa tarafından vekîl-i müsecceli olmağla vekâleten derûn-ı arzuhâlde ismi mastûr olan Ömer’in zevcesi olup zâtı ta‘rîf-i şer‘î ile mu‘arrefe olan Afîfe nâm hatun mahzarında mezbûre Afîfe müceddeden binâ eylediği işbu menzilin tabaka-i ulyâsında ve vustâsında ihdâs iki aded şâhnişînde olan üçer aded pencerelerinden bizim kadîm menzillerimizin makarr-ı nisvân olan mahallerine nezâreti ve zarar-bînî olmağla ba‘de’l-mu‘âyene zarar-ı şer‘îsi men‘ ve def‘ olunması matlûbumuzdur deyü da‘vâ eylediklerinde mezbûre Afîfe müvekkile [müvekkil]-i mezbûr ile mezbûrûnun menzillerinin kad[î]mîni bi-tav‘ihâ ikrâr ettiğinden sonra mi‘mârân-ı mezbûrân hâzır olan cemâ‘at-i Müslimîn ile mezbûrenin zikri mürûr eden şehnişînde olan üç aded pencerelerin müvekkil-i mezbûr ile mezbûrûnun menzillerinin makarr-ı nisvân olan mahallerine nezâreti ve zarar-bînî olduğunu ba‘de’l-mu‘âyene zarar-bînî tahta sütre vaz‘ıyla mündefi‘ olur deyü mi‘mârân-ı mezbûrân ihbâr etmeleriyle merkūme Afîfe’ye vech-i meşrûh üzere zarar-ı şer‘îsini def‘e mevlânâ-yı mezbûr mahallinde ba‘de’t-tenbîh merkūme Afîfe dahi râzı ve müte‘ahhide olup kat‘-ı nizâ‘ eylediklerini ümenâ-i şer‘le gelip bu dâ‘îlerine inhâ eyledikleri huzûr-ı âlîlerine i‘lâm olundu. Fî 4 min-Şa‘bâni’l-mu‘azzam sene 1143.