Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 547 Hüküm no: 704 Orijinal metin no: [132a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Ahmed ile Mustafa Efendi’nin aralarındaki davada sulh oldukları Ma‘rûz. Sâhibe-i arzuhâl Hadice bt. Ahmed nâm hatun ba‘de’t-ta‘rîfi’ş-şer‘î meclis-i şer‘de derûn-ı arzuhâlde mastûrü’l-ism Mustafa Efendi mahzarında arzuhâlinde tafsîl olunduğu vech üzere tasaddî eylediği da‘vâsından muslihûn tavassutuyla an-inkâr yüz guruş bedel-i makbûza ba‘de’l-musâlaha ve’l-kabûl husûs-ı mezkûra ve sâire müte‘allika âmme-i da‘vâdan mûmâ-ileyh Mustafa Efendi’nin zimmetini ibrâ-i âmm-ı râfi‘u’l-hısâm ile ibrâ ve iskāt edip ol vechile kat‘-ı nizâ‘ eylediklerini kıbel-i şer‘den irsâl olunan Mevlânâ Müezzinzâde Mehmed Efendi mûmâ-ileyhânın menzilinde ma‘kūd meclis-i şer‘de tahrîr ve ma‘an irsâl olunan ümenâ-i mahkeme ile meclis-i şer‘a gelip her biri inhâ ve takrîr eylediği huzûr-ı âlîlerine i‘lâm olundu. Fermân hazret-i veliyyü’l-emrindir. Hurrire fî-24 Receb [1]143. Sâbıkā kādı olan Ebûbekir Efendi’nin i‘lâmıdır.