Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 548 Hüküm no: 705 Orijinal metin no: [132a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eşya davasını ispat için verilen sürenin dolduğu Ma‘rûz. Arzuhâl eden Fâtıma Hatun dîvân-ı âlîlerinde ma‘kūd meclis-i şer‘a ihzâr eylediği Ümmügülsüm nâm hatundan merkūme Ümmügülsüm mecmû‘u iki yüz guruş kıymetli bir altın kuşak ve bir samur kürk ve bir simli kapı perdesi ve bir yastığımı kendisi’çün âharda yirmi beş guruş ve benim için yirmi beş guruş istidâne edip mukābelesinde rehin vaz‘ eylemek üzere yedinden kabz ve bana yirmi beş guruş alıvermişidi meblağ-ı mezbûru yedinden kabz ve eşyâ-i muharrere-i merkūmeyi rehin vaz‘ eylemediği mahâlde n edâ-yı deynle fek ve bana red ve teslîm olunmak üzere bundan akdem İstanbul’da Davudpaşa Mahkemesi’nde nâibü’ş-şer‘ el-mezbûr olan efendi huzûrunda merkūme Ümmügülsüm’e kıbel-i şer‘den tenbîh olunmuş iken hâlâ eşyâyı red ve teslîmden imtinâ‘ eder deyü da‘vâ eyledikde merkūme Ümmügülsüm Hatun husûs-ı mezbûru bi’l-külliye inkâr etmekle sâhibe-i arzuhâl merkūme Fâtıma Hatun’dan beyyine taleb olundukda ityân-ı beyyine için istimhâl etmeğin mehl-i şer‘î ile imhâl olunmuş idi hâlâ müddet-i mehl-i şer‘î tamam olup ve üç gün dahi tecâvüz edip merkūme Fâtıma Hatun zuhûr etmeyip yemîn dahi vermemekle merkūme Fâtıma Hatun bî-vech-i şer‘î mu‘ârazadan men‘ olunmak lâzım idiği huzûr-ı âlîlerine i‘lâm olundu. Fî 6 min-Şa‘bân sene [1]143.