Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 548 Hüküm no: 706 Orijinal metin no: [132a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Hadice Hatun’un vereselerinin açtıkları davadan men olundukları Ma‘rûz. Sâhib-i arzuhâl Mehmed ve Fâtıma’nın derûn-ı arzuhâlde mastûrü’l-ism müteveffât Hadice’nin vârisleri olduğu lede’ş-şer‘i’l-enver zâhir olmağla mezbûrân Mehmed ve Fâtıma meclis-i şer‘de hâlâ Mahmiye-i İstanbul’da emîn-i beytülmâl-ı âmme ve hâssa es-Seyyid Mustafa Ağa mahzarında mezbûr es-Seyyid Mustafa Ağa emîn-i beytülmâl olmağla mûrisimiz müteveffât-ı mezbûrenin terekesinden cinsi ve kıymeti ma‘lûmumuz olmayan mikdâr eşyâsını ahz eylediğinden mâ‘adâ yine müteveffât-ı mezbûrenin terekesinde olup Mahmiye-i mezbûrede Tokludede Mahallesi’nde vâki‘ bin üç yüz guruş kıymetli mülk menzilimi noksan-ı fâhiş ile beş yüz elli guruşa ismi ma‘lûmumuz olmayan gāib ani’l-meclis nâm kimesneye bey‘ etmekle eşyâ-i mezbûru ve menzil-i merkūmu emîn-i merkūmdan taleb ederiz deyü da‘vâ edip lâkin müdde‘iyân-ı mez[bû]rânın takrîrleri üzere menzil da‘vâları hâlâ vâzı‘u’l-yedden olup ve eşyâ da‘vâlarını dahi tashîha kādir olmamaları ile emîn-i merkūma suâl tevcîh etmeyip bî-vech mu‘ârazadan men‘ olundukları huzûr-ı âlîlerine i‘lâm olundu. Fî 6 Şa‘bân sene 1143.