Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 549 Hüküm no: 709 Orijinal metin no: [132b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hırsızlık yapan Kalaycı Halil b. Ahmed’in cezalandırılması Ma‘rûz. Mumcu Feyzullah Beşe kulları mübâşeretiyle Bâb Mahkemesi’ne izhâr olunan medîne-i İznikmid ahâlîsinden Kalaycı Halil b. Ahmed’den hasmı medîne-i mezkûrede Kertil Mahallesi’nde vâki‘ Akça Câmi‘i müezzini Molla Mehmed b. Osman meclis-i şer‘de merkūm Halil iki buçuk ay mukaddem medîne-i mezbûrede vâki‘ menzilime nerdübân ile duhûl ve oğlum işbu Süleyman nâm sagīri ifsâd ve ihtilâl ve bi-gayr-ı hakkın piştahtamı feth ve içinden kırk iki zincirli altınım ile on beş guruş kıymetli bir çift piştovumu ahz u kabz ve sagīr-i mezbûru ayardıp hâlâ mahmiye-i mezbûrede sâkin kalaycı tâifesinden Ali Beşe b. Mehmed ve Mustafa b. Mustafa ve Mustafa Beşe b. Abdullah ile İsmail Beşe b. İbrahim ve Hasan Beşe b. Mustafa nâm yeniçeriler ve medîne-i mezbûre ahâlîsinden Molla Ömer b. Mustafa ve Hâfız Molla Yusuf ve Hüseyin b. Mustafa ve Mehmed Beşe b. Ahmed nân kimesneler fi’l-vâki‘ mezbûr Halil kendi hâlinde olmayıp bu misillü sagīr ayartmak âdet-i müstemirresidir deyü sû-i hâlini ihbâr etmeleriyle mezbûr Halil’e ta‘zîr-i şedîd ve ıslâh edinceye değin habs lâzım <> geldi[ği] huzûru âlîlerine i‘lâm olundu. Fî 7 min-Şa‘bân sene 1143.