Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 551 Hüküm no: 713 Orijinal metin no: [133a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamparsum ile Cani v. Bedros’un alacak davasında sulh oldukaları Ma‘rûz. Sancakdâr Hayreddin Mahallesi ahâlîsinden iken bundan akdem hâlike olan Gül bt. Ananya nâm Ermeniyenin sadrî kebîr oğlu ve hasren vârisi idiği müte‘ayyin olan sâhib-i arzuhâl Hamparsum meclis-i şer‘de sarraf tâifesinden derûn-ı arzuhâlde mezkûr hasmı Cani v. Bedros muvâcehesinde anam hâlike-i mezbûre hayâtında bin yüz otuz yedi senesi Saferi’nde Kuds-i şerîf’e gider oldukda mâlından dört yüz elli guruş ikrâz ve bir tahta zümrüd yüzüğünü otuz guruşa merkūm Cani’ye bey‘ ol dahi ber-vech-i muharrer iktirâz ve iştirâ ve tesellüm ve’l-müstehlâk edip cem‘an dört yüz seksen guruş merkūm Cani zimmetinde iken kable’l-ahz anam mezbûre garîkan helâke olmağla bi’l-verâse taleb ederim deyü ba‘de’d-da‘vâ ve’l-inkâr müdde‘î müdde‘âsını mahalle-i mezbûreden es-Seyyid Ali b. el-Hâcı Süleyman ve Mehmed b. Osman ve Mustafa b. Abdullah ile ba‘de’l-isbât beynlerine muslihûn tavassut edip müdde‘î-i mezbûru da‘vâ-yı mezkûresinden üç yüz guruş üzerine sulh ve bedel-i sulh-ı mezkûru târih-i i‘lâmdan üç güne değin kendiye edâ ve teslîm etmek üzere merkūm Cani’yi te’cîl eyledikde merkūm Cani zimmî kabûl ve bedel-i sulh-ı mezkûru ber-vech-i muharrer edâ ve teslîme ta‘ahhüde iltizâm eylediği bi’l-iltimâs huzûr-ı âlîlerine i‘lâm olundu. Fî 11 min-Şa‘bân sene 1143.