Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 552 Hüküm no: 714 Orijinal metin no: [133a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gümüşoğlu Mustafa Ağa’dan aldığı parayı eşi Zeyneb Hatun’a ödemesi için Çukadâr Ebûbekir Ağa’ya tenbih olunduğu Ma‘rûz. Derûn-ı arzuhâlde mastûrü’l-ism müteveffâ Gümüşoğlu Mustafa Ağa’nın zevcesi olup arzuhâl eden Zeyneb Hatun asâleten ve sagīr oğulları İbrahim ve İsmail’in bâ-hüccet vasîleri olmağla vesâyeten meclis-i şer‘de derûn-ı arzuhâlde ismi mezkûr Çukadâr Ebûbekir Ağa b. Ali mahzarında mezbûr Ebûbekir Ağa târih-i i‘lâmdan üç sene mukaddem bir husûs ile Acık kal‘asına vardıkda zevcim müteveffâ-i mezbûr Gümüşoğlu Mustafa Ağa’ya Acık kal‘ası masrûfunda senin taraf-ı mîrîde olan yedi bin guruşu tahallüs ve tahsîl ederim deyü bi-tarîkı’r-rüşve mâlından ve yedinden bin guruşluk parasını ahz edip maslahat dahi husûle gelmeyip meblağ-ı mezbûr bin guruş[u] almayıp, istedikde mezbûr Ebûbekir Ağa inkâr etmekle merkūme Zeyneb müdde‘âsına ikāmet eylediği müteveffâ-i mezbûrun hayâtında hizmetinde olup hâlâ İstanbul’da Parmakkapı’da Hoca Dursun odalarında sâkin Perdâhçı Mehmed b. Mustafa ve Üsküdar’da Bülbülderesi’nde [133b] sâkin Mehmed b. Hasan nâm kimesneler fi’l-hakīka işbu Çukadâr Ebûbekir Ağa müteveffâ-i mezbûr Gümüşoğlu Mustafa Ağa’nın hayâtında târih-i i‘lâmdan üç sene mukaddem taraf-ı mîrîde olan yedi bin guruşu tahlîs ve tahsîl ederim deyü Acık kal‘asında mezbûr Mustafa Ağa yedinden bizim huzûrumuzda bi-tarîk-i rüşve bin guruşluk parasını ahz [u] kabzeyledi deyü edâ-yı şehâdet-i şer‘iyye eyledikde ba‘de’t-ta‘dîl ve’t-tezkiye şehâdetleri makbûle olmağın meblağ-ı mezbûru müdde‘iyye-i merkūme Zeyneb’e teslîme mezbûr Ebûbekir Ağa’ya tenbîh olmuşdur. Bâ-imzâ-i hazret-i efendi. Fî 12 min-Şa‘bân sene 1143.