Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 553 Hüküm no: 716 Orijinal metin no: [133b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alime bt. Sinan’ın vefât eden kocasının terekesinden dolayı olan davada diğer vârislerle sulh olduğu Ma‘rûz. Vilâyet-i Anadolu’da vâki‘ Sinop kazâsına tâbi‘ Gölgüney nâm karye ahâlîsinden iken bundan akdem vefât eden Hasan b. İdris b. Abdullah nâm kimesnenin verâseti zevce-i menkûha-i metrûkesi Alime bt. Sinan nâm hatun ile er karındaşları Halil ve İbrahim ve Mehmed ve Yusuf ve Hasan nâm kimesnelere münhasıra olmağla mezbûre <> Alime Hatun meclis-i şer‘de verese-i mezbûrûndan mezbûr Halil mahzarında mezbûr Halil zevcim müteveffâ-i mezbûrun tereke-i vâfiyesine bi’l-verâse vâzı‘u’l-yed olmağla müteveffâ-i mezbûr zimmetinde mütekarrir ve ma‘kūdun-aleyh olan sekiz bin akçe mehr-i müeccel hakkım ile terekesinden rub‘ hisse-i irsiyyemi taleb ederim deyü da‘vâ ol dahi cevâbında müteveffâ-i mezbûr karındaşı olup ber-vech-i muharrer verâseti müdde‘iyye-i mezbûre ile kendiye ve sâir karındaşları mezbûrûna münhasır olduğun ikrâr lâkin terekesine vaz‘-ı yedini inkâr etmeğin ba‘de vukū‘ı’l-münâza‘a vesâtet-i muslihîn ile mecmû‘u beşer guruş kıymetli bir el tâbesi ve bir pekmez tâbesi ve iki bakır sahan ve kebîr tencere üzerine sulh olup mehr-i mezbûra ve müteveffâ-i mezbûrun kalîl ü kesîr ve celîl ü hakīr terekesine müte‘allika âmme-i da‘vâdan her biri âharı ibrâ ve iskāt ettikleri ba‘de’t-tescîl huzûr-ı âlîlerine i‘lâm olundu. Fî 13 min-Şa‘bân sene 1143.