Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 557 Hüküm no: 723 Orijinal metin no: [134b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un vefât eden kocasının terekesi üzerine açtığı davada haksız olduğu Ma‘rûz. Muhzır İbrahim mübâşeretiyle Mahkeme-i Bâb’a ihzâr olunan Havvâ nâm hatundan hasmı Hanife nâm hatun meclis-i şer‘de İstanbul’da Koğacı Dede Mahallesi ahâlîsinden iken bundan akdem vefât eden Abdi Dede b. Abdulkādir [b.] Abdurrahman’ın verâseti sulbiye kebîre kızı mezbûre Havvâ ile sulbiye kebîre oğlu gāib ani’l-meclis Mehmed’e münhasır ve ben müteveffâ-i mezbûr Abdi Dede’nin hayâtında üç bin akçe mehr-i müeccel tesmiyesiyle zevce-i menkûhası iken bâyinen beni tatlîk ettikde mehr-i mezbûr zimmetinde iken vefât edip tereke-i vâfiyesine mezbûre Havvâ bi’l-verâse vâzı‘u’l-yed olmağla suâl olunup tereke-i müteveffâ-i mezbûrdan mehr-i mezbûru bana edâ ve teslîme tenbîh olunmak murâdımdır deyü da‘vâ eyledikde mezbûre Havvâ fi’l-hakīka müdde‘iyye-i mezbûre babası müteveffâ-i mezbûrun ber-vech-i muharrer ol mikdâr mehr-i müeccel tesmiyesiyle zevcesi olup ve müteveffâ-i mezbûrun terekesine bi’l-verâse vaz‘-ı yedini ikrâr lâkin müdde‘iyye-i mezbûre babam müteveffâ-i mezbûr ile hayâtında bin yüz otuz altı senesi Zilka‘desi’nin yedinci günü Mahkeme-i Bâb’da nâibü’ş-şer‘ olan İbrahim Efendi huzûrunda üç bin akçe mehr-i müeccele ve nafaka-i iddet-i mu‘ayyene-i ma‘lûmesi üzerlerine ve meûnet-i süknâsı dahi kendi üzerine olmak üzere muhâla‘a-i sahîha-i şer‘iyye ile muhâla‘a eyledikde ol dahi ba‘de’l-kabûl hukūk-ı zevciyyete ve târih-i mezbûra gelince sâir beynlerinde cârî ahz u i‘tâya müte‘allika âmme-i da‘vâdan babam müteveffâ-i mezbûrun zimmetini ibrâ ve iskāt etmişdir deyü da‘vâyı def‘ ve mazmûnu takrîr-i meşrûhuna mutâbık nâib-i mûmâ-ileyh imzâsıyla mümzâ ve hatmiyle mahtûm bir kıt‘a hüccet ibrâz eyledikd[e] müdde‘iyye-i mezbûre istintak olundukda mazmûn hüccet-i mezbûreyi ikrâr u i‘tirâf etmekle ıkrârı mûcebince müdde‘iyye-i mezbûre bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 19 Şa‘bân sene [1]143.