Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 557 Hüküm no: 724 Orijinal metin no: [134b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Osman Efendi’nin açtığı hırsızlık davasını ispat edemediği Ma‘rûz. Asesbaşı Mustafa Ağa kulları mübâşeretiyle Mahkeme-i Bâb’a ihzâr olunan Hasan ve Ali ve Mustafa ve diğer Hancı Mustafa nâm kimesnelerden hasmı es-Seyyid Osman Efendi meclis-i şer‘de mezbûrûn İstanbul’da Büyükkaraman’da vâki‘ sâkin olduğum Soğancıbaşı Hânı ahâlîsinden olmağla yedi gün mukaddem sâkin olduğum odamdan mecmû‘u yetmiş guruş kıymetli bir cild Tefsîr-i Ebu’l-Leys ve bir cild Şerh-i Ferâiz ve bir taban demiri kılıç ve bir güvez sof ferâce ve çuka [135a] mor ferâce ve bir beyâz sâde ve iki gömlek ve iki don ve bir peşkir ve bir sim hatem yüzüğüm zâyi‘ olup ve mezbûrûn mazanna ittihâz eylediğim ecilden suâl olunup mûceb-i şer‘îsi icrâ olunmak murâdımdır dedikde onlar dahi bi’l-külliye münkir olup müdde‘î-i mezbûr müdde‘âsını beyândan izhâr-ı acz edip tahlîfe dahi tâlib olmamağla müdde‘î-i mezbûr bilâ-beyyine bî-vech mu‘ârazadan ba‘de’l-men‘ mezbûrûn Hasan ve Ali ve Mustafa ve diğer Mustafa’nın hân-ı mezbûr dâhilinde ve hâricinde sâkin mu‘temedün-aleyh on sekiz nefer Müslimîn hüsn-i hâllerin ihbâr eyledikleri mübâşir kulları iltimâsıyla huzûr-ı âlîlerine i‘lâm olundu. Fî 14 Şa‘bân sene 1143.