Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 561 Hüküm no: 732 Orijinal metin no: [135b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fırın için yapılan masrafın keşfi Ma‘rûz. Arzuhâl eden Mustafa Paşazâde Ahmed Bey hasmı olup derûn-ı arzuhâlde ismi mastûr el-Hâc Selim b. Halîfe mezbûr Ahmed Bey’in isbât-ı vekâlet eden vekîli es-Seyyid Mehmed Efendi mahzarında müvekkil-i mezbûr Eskiodalar kurbünde Çukurçeşme’de Molla Kestel Vakfı’ndan tasarrufunda olan ma‘lûmü’l-hudûd kasab dükkânını masrûfum icâresinden hesâb ve istîfâ eylemek üzere çörekçi fırını binâsına bana izin ve emr etmekle ben dahi şartü’r-rücû‘ mâlımdan yüz seksen guruş sarf edip çörekçi fırını binâ etmişidim lâkin fırın-ı mezbûrdan men‘ olunduğuma binâen masrûfum olan yüz seksen guruşu taleb ederim deyü da‘vâ, vekîl-i mezbûr cevâbında hâl mezbûr el-Hâc Selim’in takrîri üzere olduğunu ikrâr lâkin masrûfu henüz ne mikdâr olduğu müvekkilem mezbûrun ma‘lûm[u] değildir deyü keşif nâibinde fermân-ı âlî sâdır etmekle binâen-aleyh taraf-ı şer‘den irsâl olunan keşif nâibimiz Mevlânâ Mehmed b. Abdullah Efendi hâssa mi‘mârlarından Mehmed Halîfe b. İsmail ve Ali Halîfe b. Abdullah ile zikrolunan dükkân üzerine varıp cemm-i gafîr Müslimîn huzûrunda nazar ve mi‘mârân-ı mezbûrân takvîm-i sahîh ile takvîm eylediklerinde [136a] dükkân-ı mezbûrun müceddeden binâsına mezbûr el-Hâc Selim’in masrûfu on [-beş] bin dört yüz altmış akçeye bâliğ olduğunu vekîl-i mezbûr es-Seyyid Mehmed Efendi muvâcehesinde alâ-tarîk-i şehâde haber ve hâzır olan Müslimîn dahi vech-i muharrer üzere icmâ‘ ve ittifâk eylediklerini mevlânâ-yı mezbûr mahallinde tahrîr ba‘dehû ma‘an ba‘s olunan ümenâ-i şer‘le bu dâ‘îlerine inhâ etmekle meblağ-ı mezbûr on beş bin dört yüz atlmış akçeyi mezbûr el-Hâc Selim’e teslîme vekîl-i merkūm es-Seyyid Mehmed Efendi’ye tenbîh olunduğu huzûr-ı âlîlerine i‘lâm olundu. Fî 14 min-Şa‘bân sene 1143.