Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 562 Hüküm no: 735 Orijinal metin no: [136a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacak iddiası reddedilen Lefter’in fesat üzere olduğu Ma‘rûz. Boyacı tâifesinden sâhib-i arzuhâl Lefter zimmî meclis-i şer‘de tâife-i mezbûreden Kostanti v. Yani ve Totori v. Duka ve Andreya v. Panayot ve Nikola v. Yorgi nâm zimmîler muvâcehelerinde mezbûrûn ve şerîkleri yirmi beş nefer ma‘lûmü’l-esâmî zimmîlerin bi-şartü’r-rücû‘ emirleriyle nizâmlarına müte‘allika fermân-ı âlî ihrâcı’çün mâlımdan dört yüz doksan guruş harc ve sarf etmemle meblağ-ı mezbûrdan hisseleri mikdârını mezbûrûn zimmîlerden taleb ederim deyü ba‘de’d-da‘vâ ve’l-inkâr müdde‘î-i mezbûrdan müdde‘âsına beyyine taleb olundukda ityân-ı beyyineden izhâr-ı acz edip tahlîfe dahi taleb olmamağın mezbûr Lefter bilâ-beyyine bî-vech mu‘ârazadan men‘ olundukdan sonra hakīkat-ı hâl tâife-i mezbûrenin kethüdâları Ahmed ve ihtiyârlarından on beş nefer mazbûtü’l-esâmî Müslimîn ve on sekiz nefer zimmîlerden tefahhus olundukda mezbûr Lefter’i[n] kendi hâlinde olmayıp dâimâ tezvîrât ve şirret ve fesâd üzeredir deyü sû-i hâlini ihbâr ettikleri huzûr-ı âlîlerine i‘lâm olundu. Fî 28 Şa‘bân sene 1143.