Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 562 Hüküm no: 736 Orijinal metin no: [136b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuru yemiş eminleri arasındaki davada sulh olduğu Ma‘rûz. Derûn-ı telhîsde mezkûr meyve-i huşk emâneti yevmî elli dört akçe hazîne-mânde eylediği ulûfesi mukābelesinde sâhib-i arzuhâl Ali’nin bâ-berât-ı âlîşân tasarrufunda iken sâhib-i evvel olmak iddi‘âlarıyla ref‘inden Ömer ve Yusuf’a ale’l-iştirâk tevcîh ve yedlerine [-berât-ı] âlîşân ihsân buyrulmağın mezbûr Ali zikrolunan yevmiyesini mezbûrân Ömer ve Yusuf’dan taleb [ve] da‘vâ ve ba‘de’n-nizâ‘ beynlerine muslihûn tavassutuyla iki yüz otuz guruş bedel-i makbûza sulh ve yedinde olan atîk berâtı mezbûrâna def‘ ve teslîm ve [-her] biri âharı ibrâ ve iskāt-birle kat‘-ı nizâ‘ edip mahalline kayd buyrulmak bâbında mezbûrân Ömer ve Yusuf fermân-ı âlî iltimâs ettikleri huzûr-ı âlîlerine i‘lâm olundu. Fî 27 min-Şa‘bân sene 1143.