Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 563 Hüküm no: 737 Orijinal metin no: [136b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hapiste olan Yahûdi Rafail’in alacaklılarıyla anlaştığı Ma‘rûz. Ashâb-ı arzuhâlin medyûnları olup Norsez nâm zimmîye iki yüz seksen bir guruş deyn edâsı’çün ber-mûceb-i i‘lâm kılağuz yamağı Ali Çavuş kulları yedinde mahbûs olan Rafail nâm Yahûdi’nin Mehmed Ağa nâm kimesneye Haleb metâ‘ı bahâsından yüz elli yedi buçuk guruşu ve es-Seyyid Veliyüddin Çelebi’ye Bursa ipeği bahâsından elli üç guruş ve Abdullah Çelebi’ye kezâlik Bursa ipeği bahâsından yüz kırk altı guruş ve Mosi nâm Yahûdi’ye çuka ve kumaş bahâsından yüz elli bir buçuk guruş ve Penaki zimmîye cihet-i karzdan altmış iki guruş ve Avram nâm Yahûdi’ye çuka bahâsından seksen yedi buçuk guruş ve Norsez zimmîye dülbend bahâsından iki yüz seksen bir guruş ki cem‘an bin iki yüz yetmiş bir guruş deyni olup def‘aten edâya iktidârı olmadığını her biri ba‘de’l-ikrâr medyûn-ı mezbûr Rafail taksît ve te’cîle tâlib olmağla her biri guruş başına beher şehr kendilere birer akçe verip düyûn-ı mezkû[re]yi târih-i i‘lâmdan yüz on bir ay tamamına değin hesâblaşmak üzere her biri te’cîl ve taksît eylediklerinde mesfûr Rafail Yahûdi dahi ba‘de’l-kabûl ber-vech-i muharrer edâya ta‘ahhüd eylediği huzûr-ı âlîlerine i‘lâm olundu. Fî 29 Şa‘bân sene 1143.