Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 564 Hüküm no: 741 Orijinal metin no: [137a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muşkara’ya tâbi Finase köyü zimmîlerinin vergilerini mütevellîye edaya taahhüd ettikleri Ma‘rûz. Vilâyet-i Anadolu’da Muşkara’da vâki‘ câmi‘-i şerîf vakfına ilhâk olunan Finase karyesi re‘âyâsından ashâb-ı arzuhâl Haçador v. Uğurlu ve Andreyas ve Agop ve Serkiz ve Sahak ve Artin ve Karabet ve sâirleri meclis-i şer‘de vakf-ı mezbûr mütevellîsi Mehmed Bey b. Halil b. Ali tarafından sâbitü’l-vekâle vekîli el-Hâc Musa Ağa mahzarında bundan akdem bâ-fermân-ı âlî Salih Efendi nâm kimesne karye-i mezbûr re‘âyâsını tahrîr ve defter eylediğinde müte’ehhil olan re‘âyânın senede her birinden birer guruş ve bekâr olan re‘âyânın her birinden yarımşar guruş resm-i bennâk vermek üzere tahrîr ve defter etmekle her birimize gadretmişidi deyü teşekkî eylediğimize binâen fîmâ-ba‘d mütevellî müvekkil-i mûmâ-ileyh Mehmed Bey ber-mûceb-i defter-i hâkānî müte’ehhil re‘âyâdan senede on iki akçe ve bekârından senede altı akçe resm-i bennâk ve yüz aded menzillerimizin yine senede her birinden otuzar akçe çift bozan resmi almak ziyâde nesne almamak üzere bi’l-vekâle ta‘ahhüd eylediğinde mezbûrûn re‘âyâ dahi râzı ve meblağ-ı mezkûru mütevellî müvekkil-i mûmâ-ileyhe edâya ta‘ahhüd ve ittifâk eyledikleri ba‘de’t-tescîl mezbûrûn re‘âyâ mahalline kayda ber-vech-i muharrer emr-i hümâyûn iltimâs ettikleri huzûr-ı âlîlerine i‘lâm olundu. Fî 5 N sene 1143.