Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 566 Hüküm no: 746 Orijinal metin no: [137b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Praşkeva’nın Aslan üzerine açtığı alacak davasından men olunduğu Ma‘rûz. Kazgancı tâifesinden Sancakdâr Hayreddin Mahallesi’nde sâkin Peremeli v. Praşkeva nâ[m] zimmî Muhzır Mustafa mübâşeretiyle Bâb Mahkemesi’ne ihzâr ettirdiği tâife-i mezbûreden Aslan nâm zimmî muvâcehesinde yedinde müşteri ve makbûz bakır bahâsından ba‘de’l-hesâb seksen guruş hakkım bâkī kalmağla taleb ederim deyü da‘vâ eyledikde merkūm Aslan cevâbında müdde‘î-i mezbûr on sene mukaddem husûs-ı mezkûru bir def‘a dahi benden da‘vâ ve muslihûn tavassutuyla an-inkâriyetimle on guruş bedel-i makbûza sulh olup mâ‘adâya müte‘allika âmme-i da‘vâdan zimmetimi ibrâ ve iskāt etmişidi deyü ba‘de’d-def‘ ve’l-inkâr mezbûr Aslan def‘-i mezkûrunu beynlerinde adl idiği lede’ş-şer‘i’l-enver müte‘ayyin olan Yani v. Sava ve Apostol v. Nikola ve Kostanti v. Lefter ve Yani v. Yani nâm dört nefer zimmîler ile isbât etmeğin mûcebince müdde‘î-i mezbûr bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 5 N sene 1143.