Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 568 Hüküm no: 750 Orijinal metin no: [138a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Köse Ali’nin gasbettiği para ve eşyaları sahibine teslimi gerektiği Ma‘rûz. Arzuhâl eden İsmail nâm kimesne Ağakapısı tarafından Mumcu mübâşeretiyle ihzâr-ı şer‘ olunan Şücaeddin kazâsı ahâlîsinden Köse Ali b. Mustafa nâm kimesneden beni Şücaeddin kazâsına mâlikâne mutasarrıfı tarafından işbu sene-i mübârekede voyvoda olduğum hâlde İstanbul’da vâki‘ olan fitne takrîbiyle mezbûr Köse Ali gāibûn ani’l-meclis Çot Hüseyin ve Mahmud ve Vâ‘izoğlu Hasan ve Çopur Mustafa nâm kimesneleri elli nefer eşkıyâ ile yanına alıp ben dahi Tarpas nâm karyeden hareket edip Başören karyesine gelir iken esnâ-yı tarîkde Başören karyesine karib mahalde üzerime gelip seyisânemi üzerine tahmîl olunmuş beş bin beş yüz guruş nakd ve bin guruş kıymetli sâir eşyâmı yüz elli guruş kıymetli at ve üzerinde yüz elli guruş kıymetli raht ve sâir âlâtımı ve yirmi guruş kıymetli bir re’s bârgirimi mezbûr Köse Ali gasben ahz eyledi deyü ba‘de’d-da‘vâ ve’l-inkâr müdde‘î-i merkūm İsmail ikāmet eylediği Şücaeddin kazâsı ahâlîsinden olup İstanbul’da müsâfiren sâkin Abdülfettâh Ağa b. el-Hâc Murtaza ve es-Seyyid Mehmed b. Süleyman ve Mehmed b. Ebûbekir nâm kimesneler fi’l-vâki‘ mezbûr Köse Ali zikrolunan Başören karyesi kurbünde esnâ-yı tarîkde gâibûn-ı mezbûrûn ve sâir elli nefer eşkıyâ ile müdde‘î-i mezbûr İsmail’in üzerine gelip bizim huzûrumuzda Tarpas karyesinde mezbûr İsmail’in aded seyisânesi üzerine tahmîl eylediği iki bin beş yüz guruş ile yüz elli guruş kıymetli bir re’s at ve üzerinde yüz elli guruş kıymetli sim raht ve sâir âlât ve yirmi guruş kıymetli bir re’s bârgirini mezbûr Köse Ali gasben ahz u kabz eyledi deyü edâ-yı şehâdet-i şer‘iyye eylediklerinden sonra ba‘de’t-ta‘dîl ve’t-tezkiye şahâdetleri makbûle olmağın mûcebiyle ba‘de’l-hükm meblağ-ı mezbûr iki bin beş yüz guruş ve mevcûd ise mârru’z-zikr at ve bârgir ve sim raht ve sâir âlâtın aynını müstehlek ise sâbit olan kıymetleri mezbûr Köse Ali’den şer‘an tahsîl ve sâhib-i arzuhâl İsmail’e teslîm lâzım gelip ve mezbûr İsmail ziyâde müdde‘âsını isbâta havâle olunmuşidi. Fî 14 N sene 1143.