Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 570 Hüküm no: 756 Orijinal metin no: [138b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Paşa-yı Atik Vakfı’na ait evden çıkarılan İrini’nin eşyalarının tahliyesi Ma‘rûz. Arzuhâl eden Yorgaki ve Dolet nâm zimmîlerin Ali Paşa-yı Atîk Vakfı’ndan Abdisubaşı Mahallesi’nde vâki‘ menzillerinde sâbıkā müşâhere ve müstecire olan İrini nâm Nasrâniye kendi hâlinde olmayıp menzil-i mezkûrumuzu meyhâne ve kârhâne edip dâimâ ehl-i İslâm ve kefereden erâzil ve eşhâs gelip şürb-i hamr ve nice fısk-ı fesâd üzere idiğini mahalle-i mezbûre imâmı ve ahâlîsinden cemm-i gafîr ve cem‘-i kesîr meclis-i şer‘a ihbâr ve ber-vech-i muharrer ihbârlarını i‘lâm olundukda menzil-i mezkûrdan bâ-fermân-ı âlî ihrâc ve kıbel-i şer‘den kapısı mühürlenmişiken mezbûre İrini Nasrâniye mührün kat‘ ve haber ve âgâhımız yoğiken bilâ-izn menzil-i mezkûre eşyâsını vaz‘ ve kendisi gaybet ve eşyâ-i mezkûre ile menzil-i mezbûr mu‘attal ve mukaffel kalmağla hâlâ mezbûre İrini Nasrâniye bunda olmamağın menzil-i mezkûr kıbel-i şer‘den feth ve gāibe-i mezkûrenin menzil-i mezkûr dâhilinde mevcûd olan eşyâsı tahrîr ve defter ve li-ecli’l-hıfz yed-i emîne vaz‘ ve menzil-i mezkûr ba‘de’t-tahliyye kendilere def‘ ve teslîm olunmak bâbında fermân-ı âlî iltimâs eylediklerini kıbel-i şer‘den irsâl olunan Ahmed Efendi dâ‘îleri mahallinde ketb ü tahrîr ve ma‘an irsâl olunan ümenâ-i şer‘le meclis-i şer‘a gelip inhâ ve takrîr eyledikleri huzûr-ı âlîlerine i‘lâm olundu. Fî 21 min N sene 1143.