Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 571 Hüküm no: 757 Orijinal metin no: [139a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehiden vefât eden Mustafa Ağa’nın ortağı Katana Mehmed Ağa’ya şirket malı olarak tahsil ettiği paranın yarısını vârislere ödemesi için tenbih olunduğu Ma‘rûz. Anadolu’da Şarkipare kazâsı ahâlîsinden iken diyâr-ı Acem’de şehîden vefât eden Mustafa Ağa b. el-Hâc İbrahim’in zevcesi Âişe Hatun bt. Ahmed b. Abdullah ile sulbî kebîr oğulları Mehmed ve Ahmed ve Salih ve Ebûbekir ve Halil taraflarından mûrisleri müteveffâ-i mezbûrun terekesine vâzı‘u’l-yed olanlardan ve zimem-i nâsda olan hakların taleb ve da‘vâ ve ahz u kabza ve kendilere îsâle vekîl olduğu yedinde olan vekâlet hücceti mantûkunca şer‘an sâbit olan Ömer Ağa b. el-Hâc İbrahim meclis-i şer‘de müteveffâ-i mezbûrun yanında mevcûd bulunan terekesini ve zimemde olan akçesini verese-i mezbûrûna îsâle vasiyy-i muhtâr olan hayâtında şerîki Katana Mehmed Ağa b. Ömer mahzarında mezbûr Katana Mehmed Ağa müteveffâ-i mezbûrun hayâtında şerîki ve vasiyy-i muhtârı olmağla mâl-ı şirketden Sarı Hasan Ağa nâm kimesne zimmetinde olan bin üç yüz guruşu mezbûr Hasan Ağa’dan Mahmud Paşa Nâibi Eyüb Efendi huzûrunda asâleten ve vesâyeti hasebiyle ba‘de’d-da‘vâ ve’l-isbât meblağ-ı mezbûru merkūm Sarı Hasan Ağa’dan kabz etmekle meblağ-ı mezbûrdan müvekkilelerim mezbûrûnun mûrisleri müteveffâ-i merkūm Mustafa Ağa’nın hissesi olan <> altı yüz elli guruşu mezbûr Katana Mehmed Ağa’dan bi’l-vekâle taleb ederim deyü da‘vâ, merkūm Katana Mehmed Ağa cevâbında meblağ-ı mezkûru kendi mâlı olmak üzere kabzını ikrâr mâl-ı şirketden olmak üzere i‘tirâfını inkâr eyledikde mezbûr Ömer Ağa ikāmet eylediği şuhûd-ı udûlden Süleyman Ağa b. Abdurrahman ve Ali Bey b. Abdullah nâm kimesneler fi’l-vâki‘ işbu Katana Mehmed Ağa Sarı Hasan Ağa’dan da‘vâ eylediği bin üç yüz guruşu kendisiyle vasîsi olduğu müteveffâ Mustafa Ağa b. el-Hâc İbrahim’in şirket mâlından olmak üzere bizim huzûrumuzda i‘tirâf ve kabz eyledi deyü şehâdet-i şer‘iyye edip ba‘de’t-ta‘dîl ve’t-tezkiye olundukda adâletleri zâhir olmağla mûcebiyle altı yüz elli guruşu vekîl-i mezbûra teslîme merkūm Katana Mehmed Ağa’ya tenbîh olunmuşdur. Fî 25 şehri Ramazani’l-mübârek sene 1143.