Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 573 Hüküm no: 762 Orijinal metin no: [139b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evleri arasındaki duvarı sahiplenme davasında keşif Bâ-mühr-i hazret-i efendi. Ma‘rûz. Sâdır olan fermân-ı âlîlerine imtisâlen taraf-ı şer‘den irsâl olunan Mevlânâ Abdullah Efendi b. Mehmed hâssa mi‘mâr halîfelerinden Mehmed Halîfe b. İsmail ile sâhibe-i arzuhâl Ümmügülsüm Hatun’un Hadicesultan Mahallesi’nde vâki‘ menziline varıp hâzır bi’l-meclis Müslimîn huzûrlarında ba‘de akdi’l-meclis mezbûrenin vekîl-i şer‘îsi İbrahim b. Mehmed meclis-i ma‘kūd-ı mezkûrda müvekkile-i mezbûrenin câr-ı mülâsıkı derûn-ı arzuhâlde mastûrü’l-ism Âişe mahzarında işbu mu‘âyene olunan tûlen otuz zirâ‘ ve on sekiz parmak ve kadden dört buçuk zirâ‘ ve arzen bir zirâ‘ müvekkile-i mezbûrenin mülkü taş duvarı mezbûre Âişe bi-gayr-ı hakkın zabt eder deyü istihkākan da‘vâ ve mi‘mârân-ı mezbûrân mesâhasında vekîl-i mezbûrun bâlâda takrîr-i meşrûhuna muvâfık ve zâ[hi]r-i hâl duvar-ı mezkûre mezbûre Âişe’nin vaz‘-ı yedi musaddak olmağla vekîl ber-vech-i muharrer müdde‘âsını şuhûd-ı udûlle vech-i şer‘î üzere isbât ve mûcebince ba‘de’l-hükm duvar-ı mezkûrdan kasr-ı yedine mezbûre Âişe’ye tenbîh eylediği mevlânâ-yı mezbûr mahallinde tahrîr ve ma‘an ba‘s olunan ümenâ-i şer‘le gelip inhâ etmeğin ba‘de’t-tescîli’ş-şer‘î huzûr-ı âlîlerine i‘lâm olundu. Fî 27 Şa‘bân sene 1143.