Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 574 Hüküm no: 763 Orijinal metin no: [140a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacak davasında men olduğu Ma‘rûz. Derûn-ı arzuhâlde mezkûr Asvador zimmî meclis-i şer‘de sâbıkā şerîki Kirkor zimmîden bi-şartü’r-rücû‘ emriyle Dolet nâm zimmîye kırk üç guruş deynini edâ ve Minas nâm Ermeni zimmetinde cihet-i karzdan otuz guruş hakkıma kefîl olmağın cem‘an yetmiş üç guruşu taleb ederim deyü da‘vâ eyledikde mezbûr Kirkor cevâbında mezbûr Asvador ile fesh-i akd-i şirket edip beynimizde cereyân eden ahz u i‘tâyı bundan akdem hesâb eylediğimizde otuz üç guruş bedel-i makbûza benimle sulh ve husûs-ı mezkûra ve sâire müte‘allika âmme-i da‘vâdan zimmetimi ibrâ ve iskāt etmişidi deyü def‘ ve def‘-i mezkûrunu şuhûd-ı udûlden el-Hâc İbrahim b. Mehmed ve Hüseyin Çelebi b. İsmail ve Mustafa Çelebi b. Hüseyin ile vech-i şer‘î üzere isbât etmeğin mûcebince mezbûr Asvador bî-vech mu‘ârazadan men‘ olunduğu huzûr-ı âlîlerine i‘lâm olundu. Fermân men-lehü’l-emrindir. Fî 12 L sene [1]143.