Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 575 Hüküm no: 765 Orijinal metin no: [140a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zimmet ibrası Ma‘rûz. Derûn-ı i‘lâmda mezkûr İlini Nasrâniye ta‘rîf-i şer‘î ile mu‘arrefe olduğu hâlde meclis-i şer‘de zevci İstimat v. Mihal nâm zimmî tarafından sâbitü’l-vekâle vekîli olan üveği oğlu sâhib-i arzuhâl Yorgaki zimmî muvâcehesinde merkūm Yorgaki menzilinde olan eşyâ-i ma‘lûmemi ma‘rifet-i şer‘ ve cemm-i gafîr muvâcehelerinde ber-mûceb-i defter-i müfredât tamamen ahz u kabz eylediğimden sonra zevcim müvekkil-i mezbûrdan bin guruş mehr ve cihet-i karzdan dört bin guruş ber-mûceb-i temessük hakkım olmağla meblağ-ı mezkûra mezbûr Yorgaki ile zevcim müvekkil-i mezbûrun gediğisi [güveyisi] Delot v. Lazari nâm zimmîlerden her biri kefîl olmuşlar idi deyü da‘vâya tasaddî etmişidim hâlâ da‘vâ-yı mezkûremden fâriğ ve temessük-ı merkūmu şak edip mehr-i mezkûra ve meblağ-ı mezbûra ve eşyâ-i mezkûreye ve târih-i i‘lâma gelince sâir beynimizde cereyân eden ahz u i‘tâ ve hukūk-ı ma‘lûme ve mechûleye müte‘allika âmme-i da‘vâ ve mütâlebât ve muhâsamâtdan ben müvekkil-i mezbûr ile mezbûrân Yorgaki ve Delot zimmîleri ve Anton ve Yanaki ve Eleti nâm sifrleri ibrâ-i âm ve kātı‘u’n-nizâ‘la ibrâ ve iskāt eyledim dedikde mezbûrân Yorgaki asâleten ve ve vekâleten ve mezbûr Delot asâleten ber-vech-i muharrer mezbûre İlini’yi ibrâ ve iskāt edip kat‘-ı nizâ‘ ettikleri tescîl ve huzûr-ı âlîlerine i‘lâm olundu. Fî 14 Şevvâl sene 1143.