Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 575 Hüküm no: 766 Orijinal metin no: [140a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacak davasında men olunduğu Bâ-mühr-i hazret-i efendi. Ma‘rûz. Sâhib-i arzuhâl İbrahim meclis-i şer‘de hasmı izzetlü Niğdeli Ali Ağa hazînedârı Ahmed muvâcehesinde bundan akdem bir fermân ihrâcı husûsi’çün bi-tarîkı’r-rüşve mezbûr Hazînedâr Ahmed’e hizmetkârım diğer Ahmed b. Hasan yediyle dört yüz guruş irsâl ü îsâl eylediğimde ol dahi ber-vech-i muharrer ahz u kabz etmeğin taleb ederim deyü da‘vâ eyledikde mezbûr Hazînedâr Ahmed cevâbında meblağ-ı mezbûru ber-vech-i muharrer ba‘de’l-kabz müdde‘î-i mezbûr emriyle izzetlü defterdâr efendi çukadârı Hasan b. Mehmed’e def‘ ve teslîm ol dahi yedimden ahz u kabz etmişidi deyü da‘vâyı def‘ ve def‘-i mezkûrunu ba‘de’t-tezkiye adâletleri zâhir olan Eyyübî Ali Ağa b. Veli ve ağa-yı mûmâ-ileyh etbâ‘ından Ahmed Ağa b. Hasan nâm kimesneler ile muvâcehesinde vech-i şer‘î üzere isbât etmeğin mevkūfen ale’l-yemîn mûcebince mezbûr İbrahim bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 12 L sene 1143.