Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 577 Hüküm no: 770 Orijinal metin no: [140b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çamaşırcı esnafının şikayetçi oldukları el-Hâc Ali’yi ihraç talebi Ma‘rûz-ı dâ‘î. Câmeşûy tâifesinin kethüdâları sâhib-i arzuhâl Mustafa ve Yiğitbaşı el-Hâc Mehmed ve erbâbından on beş nefer ma‘lûmü’l-esâmî kimesneler meclis-i şer‘de el-Hâc Ali b. Yunus mahzarında mezbûr el-Hâc Ali sâbıkā tâife-i mezbûre erbâbından olup kendi hâlinde olmayıp her birimizi rencîde ve ta‘cîz ve beynimizde ihtilâle bâ‘is olmağla müte‘addid i‘lâm ve bâ-fermân-ı âlî tâife-i mezbûre umûruna min-ba‘d müdâhale etmemeyip ihrâc olunmuş iken kanâ‘at etmediğinden nâşî her birimize bi-gayr-ı hakkın ifk ü iftirâ ve zâbitlerimize habsettirmekle bir vechile kendiden emniyet ve rahatımız kalmamışdır deyü muvâcehesinde teşekkî edip mezbûr el-Hâc Ali diyâr-ı âhardan olmağla vatan-ı aslîsine ircâ‘ olunmak bâbında emr-i âlî iltimâs ettikleri huzûr-ı âlîlerine i‘lâm olundu. Fermân men-lehü’l-emrindir. Fî 21 L sene 1143.