Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 581 Hüküm no: 783 Orijinal metin no: [142a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zimmet ibrasından dolayı açılan zarar davasının men olunduğu Bâ-mühr-i hazret-i efendi. Ma‘rûz. Arzuhâl eden bostanî hasekilerinden Ahmed Haseki sâbıkā bostancıbaşı olup derûn-ı arzuhâlde mastûrü’l-ism Süleyman Ağa’dan Keşan mukāta‘ası’çün iki sene medfû‘u olan meblağa müte‘allika âmme-i da‘vâdan mezbûr Süleyman Ağa’nın zimmetini ibrâ ve iskāt eylediği huzûr-ı âlîlerinde ma‘kūd meclis-i şer‘de inkâr ile iki bin yedi yüz elli guruş zarâr da‘vâ eylediğinde merkūm Süleyman Ağa dahi mezbûr Ahmed Haseki’nin kendiye âmme-i da‘vâdan zimmetini ibrâ ve iskāt eylediği şuhûd-ı udûl ile isbât eyledikde şâhidleri tezkiye esnâsında merkūm Ahmed Haseki ibrâ-yı mezbûrun vukū‘unu ikrâr u i‘tirâf etmekle mezbûr Süleyman Ağa’nın berâeten zimmetine hükm-birle müdde‘î-i mezbûr Ahmed Haseki zarâr da‘vâsından men‘ olunduğu huzûr-ı âlîlerine i‘lâm olundu. Fî 3 Zilka‘de sene 1143.