Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 582 Hüküm no: 784 Orijinal metin no: [142a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman’a açılan ev basma iddiası davasından vazgeçildiği Ma‘rûz. Derûn-ı arzuhâlde mezkûr Hüseyin meclis-i şer‘de sâhib-i arzuhâl Süleyman muvâcehesinde mezbûr Süleyman sekiz sene mukaddem [bin yüz] otuz beş senesi Muharremi’nde Anadolu’da Develi kazâsına tâbi‘ Zile nâm karyede sâkine Şemsî Hatun’un iki nefer ismi ma‘lûmum olmayan refîkleriyle gece menzilini basıp mezbûre Şemsî Hatun hâmil olmağla havfından nâşî vaz‘-ı haml ve dört gün mürûrunda vefât etmekle verâseti zevci İbrahim ve li-ebeveyn er karındaşı olmağla bana münhasıra olmağın mûceb-i şer‘îsini taleb ederim deyü da‘vâ ve mezbûr Süleyman cevâbında târih-i mezkûrda Kumkapı hâricinde sâkin Pazarcı el-Hâc Osman nâm kimesne Hacc-ı şerîfe gider oldukda beni dükkân-ı mezkûrda bırağıp [bin yüz] otuz dört ve [bin yüz] otuz beş senelerinde kat‘â bir yere gitmeyip mahâll-i mezkûrda sâkin olduğumu şöhret ve tevâtür ile beyân ederim deyü def‘ ve fi’l-hakīka târih-i mezkûrda mezbûr Süleyman dükkân-ı mezkûrda sâkin idiğini Kumkapı hâricinde İmâm Mahmud Efendi ve mahâll-i mezkûrda sâkin mazbûtü’l-esâmî kırk beş nefer Müslimîn şöhret ve tevâtür ile her biri alâ-tarîkı’ş-şehâde mezbûr Hüseyin muvâcehesinde ihbâr etmeleriyle mezbûr Hüseyin da‘vâ-yı mezkûresinden fâriğ ve mezbûr Süleyman’ı ibrâ eyledim dediği tescîl ve huzûr-ı âlîlerine i‘lâm olundu. Fî 3 Zilka‘de sene 1143.