Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 582 Hüküm no: 786 Orijinal metin no: [142a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Ali hakkındaki iddiaların yalan olduğu Ma‘rûz. Mumcu Mustafa Beşe mübâşeretiyle Bâb Mahkemesi’ne ihzâr olunan vilâyet-i Anadolu’da Tavas kazâsı ahâlîsinden hâlâ kazâ-i mezbûrede serdâr olan Süleyman b. Ali nâm yoldaşın hasmı olup kazâ-i mezbûra tâbi‘ Yarangömü nâm karyeden Mehmed [b.] Kasım ve Ömer b. Ali meclis-i şer‘de mezbûr Süleyman on dört yaşında iken târih-i i‘lâmdan yirmi iki sene mukaddem hâlâ zevce-i menkûham Âişe nâm hatuna fi‘l-i şenî‘ kasdıyla iki üç altın bir ecnebiye avrat ile yedi ve vâsıtasıyla gönderip ıslâh etmişidi deyü da‘vâ ve mezbûr Ömer dahi merkūm Süleyman Beşe’nin çavuşu Hüdaverdi nâm kimesne cerîme nâmıyla bi-gayr-ı hakkın on dört guruşumu ahz u kabz etmişidi deyü da‘vâ eylediklerinde mezbûr Süleyman istintak olundukda ba‘de’l-inkâr mezbûr Mehmed’in takrîr-i meşrûhu üzere zamân mürûrundan mâ‘adâ da‘vâsından şirret fehm olunmağla kazâ-i mezbûr ahâlîsinden olup hâlâ İstanbul’da müsâferet vechi [üzere sâkin] olan Süleyman Efendi b. Ali ve Molla Süleyman b. Mustafa ve el-Hâc İbrahim b. Abdullah ve Abdurrahman b. Ferhah ve Ali Bey b. Himmet ve Veli Bey b. Abbas ve Molla Halil b. Ali ve Ömer Beşe b. Mehmed ve diğer Ömer Beşe b. Ali ve Hasan Beşe b. Ramazan ve İsmail Beşe b. Mehmed ve Hasan Beşe b. Siyavuş [142b] ve Süleyman Efendi b. Hasan ve diğer Siyavuş b. Ebûbekir ve Molla Mehmed b. Veli nâm kimesneler meclis-i şer‘de mezbûrân Ömer ve Mehmed kendi hâllerinde olmayıp ibâdullâhı dâimâ ehl-i örf tâifelerine gamz âdet-i müstemirreleri ve tasaddî ettikleri da‘vâ şirret <> ve iftirâ <> olup serdâr-ı merkūm ehl-i ırz ve zâbit ve her vechile müstakīm ve mu‘temed cümle kazâ-i mezbûr ahâlîsinin vazî‘ ve şerîfi ve re‘âyâsı hoşnûd ve râzılarız deyü muvâcehesinde sû-i hâllerini ve merkūm serdârın hüsn-i hâlini haberleri huzûr-ı âlîlerine i‘lâm olundu. Fî 5 Zilka‘de sene 1143.