Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 583 Hüküm no: 787 Orijinal metin no: [142b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahpus Papa Dimitri’nin borcunu ödeyecek gücü olmadığından hapisten tahliyesi İbrahim Efendi’nin Bâb Nâibi Lütfullah Efendi’nin i‘lâmıdır. Ma‘rûz. Derûn-ı arzuhâlde mezkûr Praşkeva nâm zimmîye altı yüz on yedi guruş deyn için yetmiş beş günden berü mahbûs idiği müte‘ayyin olan sâhib-i arzuhâl Papa Dimitri meclis-i şer‘de dâyin-i mezbûr Praşkeva muvâcehesinde meblağ-ı mezbûr merkūm Praşkeva ve sâir ma‘lûmü’l-esâmî kimesnelere düyûn-ı şîrem [şer‘iyye] olup üzerimde lâbis olduğum işbu köhne libâsdan mâ‘adâ düyûn-ı mezkûremi edâya ism-i mâl ıtlâk olunur nesnem olmamağın hakīkat-ı hâli işbu hâzirûn bi’l-meclis Müslim ve ehl-i zimmetden ba‘de’t-tefahhus vakt-i yesârına değin habsden ıtlâk ve sebîlim tahliyye olunmak murâdımdır dedikde mesfûr Dimitri’nin yesârına dâyini mezbûr Praşkeva’dan beyyine taleb olundukda ityân-ı beyyineden izhâr-ı acz edip medyûn-ı mezbûrun mahallesi imâmı Ali Efendi ve Müezzin es-Seyyid Mehmed ve ahâlîsinden İsmail Halîfe ve Mustafa Çelebi ve ehl-i zimmetden işbu ma‘lûmü’l-esâmî on nefer zimmîler fi’l-hakīka medyûn-ı mezbûrun üzerinde lâbis olduğu işbu libâsından mâ‘adâ deynini edâya ism-i mâl ıtlâk olunur nesnesi olmayıp fakīr ve mu‘dimdir deyü her biri i‘sârını alâ-tarîkı’ş-şehâde ihbâr ve mezbûr Praşkeva dahi ikrâr u i‘tirâf etmeğin mûcebince medyûn-ı mezbûrun vakt-i yesârına değin habsden ıtlâk ve sebîli tahliyye olunduğu huzûr-ı âlîlerine i‘lâm olundu. Fî 24 Rebî‘ülâhir sene 1143.