Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 584 Hüküm no: 789 Orijinal metin no: [142b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papa Dimitri’nin borcunu ödemeye kudreti olmadığından hapsinin meşru olmadığı Ma‘rûz. Sâhib-i arzuhâl Papa Dimitri’nin hasmı Cabor nâm zimmî meclis-i şer‘de yedimden müşteri ve makbûz ipek bahâsından mesfûr Dimitri zimmetinde yüz elli guruş hakkım olmağla taleb ederim deyü da‘vâ eyledikde ol dahi ba‘de’l-ikrâr lâkin meblağ-ı mezbûru bir vechile edâya iktidârım olmamağın âhar dâyinlerim i‘sârımı meclis-i şer‘de vech-i şer‘î üzere her biri ihbâr etmişler idi deyü takrîr-i meşrûhuna mutâbık iki kıt‘a i‘lâm-ı şer‘î ve mûcebince fermân-ı âlî ibrâz eyledikde müdde‘î-i merkūmdan mesfûr Papa Dimitri’nin yesârına beyyine taleb olundukda ityân-ı beyyineden ihzâr-ı acz etmekle merkūm Papa Dimitri’nin yedinde olan fetvâ-yı şerîfe mûcebince yesârı zâhir ve sübûtuna değin habsi meşrû‘ olmadığı huzûr-ı âlîlerine i‘lâm olundu. Bâkī fermân men-lehü’l-emrindir. Fî 5 min-Zilka‘deti’ş-şerîfe sene 1143.