Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 585 Hüküm no: 793 Orijinal metin no: [143a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Mehmed’e boşandığı karısı Sâliha Hatun’a olan mehrini ödemesi için tenbih olunduğu Ma‘rûz. Sâhibe-i arzuhâl Sâliha Hatun meclis-i şer‘de derûn-ı arzuhâlde mezkûrü’l-ism zevc-i sâbıkı el-Hâc Mehmed mahzarında mezbûr el-Hâc Mehmed on sene mukaddem zevcesi olduğum hâlde beni bâyinen tatlîk etmekle zimmetinde mukarrer ve ma‘kūdun-aleyh üç bin akçe mehr-i müeccelimi bana edâ ve teslîm etmemekle taleb ederim deyü da‘vâ eyledikde mezbûr el-Hâc Mehmed cevâbında müdde‘iyye-i mezbûre bin beş yüz akçe mehr-i müeccel tesmiyesiyle zevce-i menkûhası olduğu[nu] ikrâr lâkin târih-i mezkûrede mehr-i mezkûru üzerine benimle muhâla‘a eylediğinde ben dahi hul‘-ı mezbûru ba‘de’l-kabûl hukūk-ı zevciyyete müte‘allika da‘vâdan zimmetimi ibrâ etmişidi deyü ba‘de’d-def‘ ve’l-inkâr mezbûr el-Hâc Mehmed’den def‘-i mezkûruna beyyine taleb olundukda ityân-ı beyyineden izhâr-ı acziyle istihlâk ettikde müdde‘iyye-i mezbûre tahlîf-i şer‘î ile ba‘de’t-tahlîf mûcebince ikrâr-ı mertebesi bin beş yüz akçeyi müdde‘iyye-i mezbûreye edâya mezbûr el-Hâc Mehmed’e ba‘de’t-tenbîh müdde‘iyye-i mezbûre mehr-i mezkûr bin beş yüz akçe ziyâde idiğini şuhûd-ı udûl ile isbât etmeğin mûcebince hükmolunduğu huzûr-ı âlîlerine i‘lâm olundu. Fî 7 min-Zilka‘de sene 1143.