Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 99 Hüküm no: 64 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalyoncu Mehmed Beşe’nin kölesinin hür olduğunu ispat etmesi Rıkk-ı sâbıkını mu‘terif olmağla ber-vech-i âtî da‘vâya kıbel-i şer‘den me’zûn zenciyyü’l-asl bâ‘isü hâze’l-kitâb Muhammed b. Ahmed nâm Arab gulâm meclis-i şer‘-i şerîf-i enverde rık olmak üzere kendiye vâzı‘u’l-yed olan Kapudan es-Seyyid Mustafa neferâtından Kalyoncu Mehmed Beşe b. Ebûbekir mahzarında üzerine da‘vâ ve takrîr-i kelâm edip ben medîne-i Cezâyir ahâlîsinden Circe kasabasında vâki‘ Darbü’l-ayn mahallesinde sâkin hürrü’l-asl Ahmed’in firâşından ve zevce-i menkûhası hürretü’l-asl Terkiyye bt. Alisi nâm hatundan mütevellid hürrü’l-asl iken kat‘a bana ve ebeveynime rık târî olmuş değil iken mezbûr Kalyoncu Mehmed Beşe rık olmak üzere bi-gayr-ı hakkın bana vaz‘-ı yed etmekle suâl olunup yed-i mubtılesi benden def‘ ve sebîlim tahliye olunmak matlûbumdur dedikde gıbbe’s-suâl mezbûr Kalyonco Mehmed Beşe cevâbında müdde‘î-yi mezbûru târih-i kitâbdan dokuz ay mukaddem Mısrî Sarrâc Seydi Mehmed’den yirmi altı zencîrli altına rık olmak üzere iştirâ ve kabz etmişidim deyü ber-vech-i muharrer vaz‘-ı yedini ikrâr ve mâ‘adâyı inkâr edicek müdde‘î-yi mezbûrdan müdde‘âsını mübeyyine beyyine taleb olundukda udûl-i Müslimînden fi’l-asl mârrü’z-zikr Darbü’l-ayn mahallesi ahâlîsinden olup mahmiye-i İstanbul’da Hoca Paşa mahallesinde sâkin el-Hâc Musa b. Selim ve Şadırvan ahırında sâkin Ebûbekir b. Muhammed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘î-yi mezbûr Muhammed medîne-i Cezâyir a‘mâlinden Circe kasabasında vâki‘ Darbü’l-ayn mahallesinde sâkin hürrü’l-asl Ahmed b. Hasan’ın firâşından hâsıl ve zevce-i menkûhası hürretü’l-asl Terkiyye bt. Alisi nâm hatundan mütevellid hür olup kat‘a ebeveynine rık târî olmuş değildir biz bu husûsa bu vech üzere şâhidleriz şehâdet ederiz deyü her biri edâ-i şehâdet-i şer‘iye ettikde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm gulâm-ı mezbûrun sebîli tahliye olunup mâ-vaka‘a bi’t-taleb ketb olundu. Fî 16 min-Şevval sene 1143 Şuhûdü’l-hâl: Ahmed b. Ali, Hacı Ahmed b. Mustafa, Mehmed b. Abdullah, Molla İbrahim b. Mustafa, Du‘âcı Muhzır.