Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 165 Hüküm no: 148 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa’da Cebeleyn kâtiplerinin görev ve alacakları ücretle ilgili yapılan itirazın reddi Nezâret-i hazret-i sadrazamîde olan evkāfdan medîne-i Bursa’da âsûde merhûm ve mağfûrün-leh Gāzi Hüdavendigar evkāfının yevmî iki akçe vazîfe ile Cebel-i cedîd ve senevî iki müd hınta ve iki müd şa‘îr ve yevmî iki akçe vazîfe ile Cebel-i atîk kâtibi olan Rûhîzâde Ahmed Efendi b. Mehmed Efendi dîvân-ı hazret-i a‘zamîde ma‘kūd meclis-i şer‘-i şerîf-i enverde vakf-ı mezbûrun bâ-berât-ı âlîşân kâtib-i evveli olup bâ-fermân-ı âlî Âsitâne-i sa‘âdet’e ihzâr olunan râfi‘u’l-kitâb Osman Efendi b. el-Hâc Mustafa mahzarında üzerine da‘vâ ve takrîr-i kelâm edip Cebeleyn-i mezkûreyn kitâbeti berat-ı âlîşân ile üzerimde olmağla hizmetim mukābelesinde avâyid-i kâtibiyeme mezbûr Osman Efendi vakf-ı mezbûrun kâtib-i evveliyim deyü vazîfem ve cerremden mâ‘adâsına vaz‘-ı yed ve müdâhale ettirmemekle suâl olunsun dedikde gıbbe’s-suâl merkūm Osman Efendi cevâbında Gāzi Hüdavendigar evkāfından gerek Cebeleyn ve gerek sâir mahallerde vâki‘ olan intikālât ve ferâgât ve temessükât-ı tapu ve defter-i muhâsebât vesâir tahrîrât-ı vakf bi’l-cümle kâtib-i evvel olanların kalemleriyle olagelip avâyid-i kâtibiye kâtib-i evvelin olup kâtib-i Cebeleyn olanlar ancak vazîfesini ve cerresini ala gelmişlerdir hatta husûs-ı mezbûr için merkūm Ahmed Efendi Bursa kādısına hitâben ısdâr ettirdiği fermân-ı âlî ile hâlâ Bursa’da hâkimü’ş-şer‘-i şerîf olan Mehmed Reşid Efendi huzûrunda merkūm Ahmed Efendi ile mürâfa‘a olduğumda ahâlî-i vilâyetden mevâli-i izâm ve müderrisîn-i kirâm ve evkāf-ı selâtîn mütevellîleri ve mürtezikaları vesâir ehl-i vukūfdan cemm-i kesîr ve cemm-i gafîr yedimde olan işbu hüccet ve i‘lâmlar mantûkunca mezbûr Ahmed Efendi muvâcehesinde hâl vech-i muharrer üzere olduğunu alâ-tarîkı’ş-şehâde haber vermeleriyle mûmâ-ileyh efendi dahi yedime işbu arz ve hücceti i‘tâ etmekle tarafeynin dahi yedimizden olan senedât ve evâmir ve berevâta nazar olunsun deyü takrîrine mutâbıka ve müdde‘âsını nâtıka hüccet ve i‘lâm ve evâmir-i âlîşân ibrâz edip nazar olundukda fi’l-vâki‘ meâlleri Cebeleyn kâtibi olanlar ancak ta‘yîn olunan vazîfe ve cerrelerin ala gelip kâtib-i evvelin avâyidine müdâhale etmeyip ve kâtib-i evvel olanlar dahi vakf-ı mezbûrda vâki‘ olan intikâlât ve ferâgât ve temessükât-ı tapu ve defter-i muhâsebât vesâir tahrîrât-ı vakf kalemiyle olageldiğini her biri nâtık olduğundan mâ‘adâ mazmûn-ı hücceti dahi merkūm Rûhîzâde Ahmed Efendi mu‘terif olmağla mûceblerince merkūm Ahmed Efendi bi-gayr-ı vechi şer‘î mezbûr Osman Efendi’ye mu‘ârazadan men‘ olunup mâ-vaka‘a bi’t-taleb ketb olundu. Fî 26 Zilka‘de sene [1]143. Şuhûdü’l-hâl: Umdetü’l-kuzât Abdullah Efendi Musazâde, Fahrü’z-zu‘amâ Abdullah Ağa b. Ömer Ağa, Fahrü’l-cüyûş Kulaguz Mustafa Çavuş, Mehmed Çavuş Ağa b. ( ) alkışî, Çukadâr Memiş Beşe, Ali Ağa ser-muhzırân.